Киир

Киир

АЛРОСА Мииринэйгэ оҕо эбии үөрэхтээһинин киинин тутуутугар анаан 230 мөл. солк. биэрдэ. Саҥа Дыбарыас дьиэтин тутуу быйыл сыл бүтүүтэ түмүктэниэҕэ, оттон 2022 сылтан оҕолор дьарыктанан барыахтара.

Оҕо Дыбарыаһа урут ситэ тутуллубатах ХИФУ политехническэй институтун куорпуһун оннугар, куорат онус кыбартаалыгар дьэндэйиэҕэ. Бырайыак быһыытынан, саҥа дыбарыаска 200-тэн тахса оҕо дьарыктанар кыахтаныаҕа. Тутуллуохтаах оҕо киинэ – 4 этээстээх, онно 40-тан кырата суох араас куруһуоктар, секциялар, ол иһигэр ырыаҕа-тойукка, үҥкүүгэ аналлаах куруһуоктар үлэлиэхтэрэ, араас уус-уран ускуустуба мастарыскыайдара баар буолуохтара.

“Оҕо-аймах – биһиги инники кэскилбит. Биһиги кинилэр доруобай, дьоллоох буолалларыгар, үөрэ-көтө сылдьалларыгар уонна сөбүлүүр дьарыктаах буолалларыгар ис сүрэхпититтэн баҕарабыт. Мииринэйгэ тыһыынчанан оҕо олорор, оттон билигин баар суос-соҕотох эбии үөрэхтээһиммит киинэ барыларын батарар кыаҕа суох. Инньэ гынан, кырачааннарбытыгар анаан саҥа, аныгылыы киин наада, онно баҕалаахтар сөбүлүүр дьарыктарын булан үүнэргэ-сайдарга кыахтаныах этилэр. Саҥа кииҥҥэ эгэлгэ куруһуоктар, ол иһигэр робототехникаҕа, программированиеҕа уонна омук тылын үөрэтиитигэр аналлаах эбии дьарыктар тэриллиэхтэрэ”, - диэн АЛРОСА генеральнай дириэктэрин солбуйааччы Алексей Дьячковскай бэлиэтээбит.

Саҥа эбии үөрэхтээһин киинэ 3 симиэнэн үлэлиирэ былааннанар. Оҕо Дыбарыаһыгар манныктар баар буолуохтара:

  • “Кванториум” оҕо паарката. Онно хайтек-киин, бырамыысалыннай робототехника куруһуога, биоквантум уонна бырамыысалыннай дизайн салаалара үлэлиэхтэрэ.
  • Фольклор хайысхалаах, хореографиялаах, вокаллаах, театральнай уонна да атын салаалардаах култуурунай-үөрэтэр киин.
  • Оҕолорго сыыппара үөрэхтээһинин киинэ. Онно оҕолор информационнай технология, программрование уонна виртуальнай чахчы сатабылларын иҥэриниэхтэрэ, систиэмнэй администрирование уонна бырагырааммалааһын олуктарын үөрэтэн VR/AR сыһыарыылары бэйэлэрэ таҥар буолуохтара.
  • Тыллары үөрэтии киинигэр аангылыйа, кытай, немец уонна да атын омук тылларын олох кыра оҕо эрдэхтэриттэн умсугуйан үөрэтиэхтэрэ.
  • Маны таһынан, коворкинг-киин уонна оҕолору кыра саастарыттан сайыннарыы киинэ баар буолуоҕа.

Бу туһунан АЛРОСА пресс-сулууспата иһитиннэрэр.

Тарҕат:

Санааҕын суруй

Бүтэһик сонуннар