Арассыыйа Сэбилэниилээх күүстэригэр аармыйаҕа ыҥырыы сааскы хомуура муус устар 1 күнүттэн от ыйын 15 күнүгэр дылы ыытылла турар. Хоту улуустарга хомуур ыам ыйын 1 күнүттэн саҕаланыаҕа.
Саха сириттэн сааскы хомуурга 1300 уолу ыҥырар сорук турар. Билиҥҥитэ хомуур хамыыһыйатын 800-тэн тахса уол ааспыт, онтон 140 уол барара биллибит. Муус устар 17 уонна 27 күннэригэр 150 бастакы саллаат сулууспалыы көтүөҕэ. Саллааттары барыахтарын иннинэ коронавируска бэрэбиэркэлииллэр. Ольга Балабкина улуустарга "саллааттыы барааччыларга хамсык быһыытын бастакы уочарат биэриҥ" диэн сорудахтаабыт.
