Киир

Киир

Күндү ааҕааччылар! Муус устар 12-15 күннэригэр «Саха ынаҕын туһунан ырыа куонкуруһун» хоһоонноругар ааҕааччылар сыанабыллара ыытылынна.

Бүгүн инники күөҥҥэ тахсыбыт, үгүс ааҕааччы биһирэбилин ылбыт, үс ааптардар хоһооннорун таһаарабыт:

-2467 куолаһы Таатта улууһуттан төрүттээх – Валентина Комиссарова “Саха ынаҕа” диэн хоһоонунан хомуйда.

-1982 куолас Нам улууһун Таастаах нэһилиэгиттэн төрүттээх - Софья Михайлова «Барытыгар бастыҥ - Бартыһаан» диэн хоһоонугар киирдэ.

-1295 куолаһы Ньурба улууһун, Чуукаар нэһилиэгиттэн төрүттээх – Маргарита Егорова “Саадьаҥкабын таптыыбын” диэн хоһоонунан ылла.

  • Валентина Комиссарова – Күлүмүрэ

Саха ынаҕа

Үүтэ хойуу, муоһа токур

Бээгэй саха ынаҕа -

Мааны майгы, улуу тулуур,

Үрдүк Айыы бэлэҕэ.

Сылын аайы чэчирээтин

Сайылыкпыт чэлгийэн,

Бээгэй атыыр мөҥүрээтин -

Кэскил төрдүн көмүскээн!

Үрүҥ илгэ үрүлүйдүн -

Саха омук тускута,

Хаҥыы турдун, халыҥаатын

Өбүгэлэр баайдара!

Үрүҥ тунах ыһыахтарга

Оҕо-уруу дэлэйдин,

Сардаҥалаах аартыктарга

Саха омук үктэннин!

  • Софья Михайлова

 

“Барытыгар бастыҥ - "Бартыһаан"

Төрүт сирбитигэр төннөн,

Салгыы сайдардыы салайан,

Айгыр-силик айылҕалаах

Талба-мааны Таастаахха,

Түөрэхпитин түһэрбит,

Төлкөбүтүн түстээбит

Ытык-мааны кырдьаҕас,

Ала оҕонньор саҕана,

Аһатан - сиэтэн абыраабыт,

Саха сүөһүтэ мэччийэр.

Билсиҥ, эһиги иннигитигэр -

Барытыгар бастыҥ - "Бартыһаан".

Саханы саха дэппит,

Кэпсэлгэ киирбит  - киэн туттуубут!

Дьиэтийбит сирин- уотун,

Киэҥ нэлэмэн хонууларынан,

Кэрийэрин быыһыгар,

Дыргыл сыттаах алаас отун,

Тиҥиргэччи кирдиргэтэр,

Сылайан сытар кэмигэр,

Аат харата астына кэбинэр...

Күн сиригэр айыллан кэлбит,

Сүрүн соругун толорон,

Муннун үүттэтэн,

Чурумчу иилинэн,

Булгуруйбат суон моонньугар

Бурҕалдьы кини кэтэн,

Быччыҥ-быччыҥа быыппастан,

Көхсүн этэ күүрбэхтээн,

Муннун "буус" гына- гына,

Сыарҕа соһон дьүккүйэр,

Көлүүр оҕус аатыран,

Күннээҕи үлэтин толорор.

Маны таһынан,"Бартыһаан",

Кэрэ көстүүтүнэн киэргэтэр,

Эллэй саҕаттан ыһыллар

Үрүҥ тунах ыһыахтары...

Улуу Туймаада хочотугар,

Алдаҥҥа Олоҥхо ыһыаҕар,

Дойдутун Намын сиригэр

Кэрэ кэпсэл буолбута.

"Бартыһаан" өссө - артыыс бэрдэ,

Аатырбыт "Тыгын Дархаҥҥа"

Өбүгэбит олоҕун укулаатын

Көрдөрөн киллэрдэ кылаатын.

Саха оҕуһа" Бартыһаан"-

Таҥара бэлэҕэ дэһэбит.

Саха омук төрүт баайа -

Саха сүөһүтэ - эстибэтин!

Нам улууһа, Таастаах.

  • Маргарита Егорова

 

Саадьаҥкабын таптыыбын.

Ырыа ыллыы ыллыыбын,

Ыыбын сахам ынаҕын,

Ырыам ыраах дьиэрэйэр,

Ымыы чыычаах ыллаһар.

Ырыа ыллыы ыллыыбын,

Сүөгэй, арыы далбарын -

Сахам бастыҥ ынаҕын

Саадьаҥкабын таптыыбын.

Ырыа ыллыы ыллыыбын,

Куччугуйкаан бэйэтин,

Кылгас, сытыы муосчаанын

Көрөн, сэмээр сэргиибин.

Ырыа ыллыы ыллыыбын,

Хонуу ото амтаннаах,

Хочо сирбит сыттардаах

Хойуу үүтүн хайгыыбын.

Ырыа ыллыы ыллыыбын

Эмтээх үүтүн иһэммин,

Эппэр-хааммар иҥэрэн,

Эдэр, чэгиэн сылдьабын.

Ырыа ыллыы ыллыыгыт,

Сахам сайдам ыччата,

Саха ынаҕын ииттэҥҥит

Сайдар суолу тутуһуҥ.

Ньурба улууһа, Чуукаар.

Ааҕааччы биһирэбилин ылбыт хоһоонньуттарбытын эҕэрдэлиибит!

Сотору кэминэн анал дьүүллүүр сүбэ бастыҥ хоһоону талан ааттыаҕа.

Мелодистар уонна ырыа айааччылар болҕомтолоругар! “Саха ынаҕын туһунан ырыа куонкуруһа” күрэххэ кыттыбыт туох баар хоһооннор биһиги саайпытыгар бэчээттэнэн тураллар. Ким баҕалаах Кыым.ру саайтка киирэн, сөбүлүү көрбүт хоһоонугар матыып айан, иэйэн-куойан ырыа айан ыытыан сөп. Нуотаҕа түһэрии уонна да атын хааччах суох, бэйэҕит хайдах кыаллыбытынан устан ыытаҕыт. Ырыаҕытын видеоҕа устан – 8-924-563 -65-88 нүөмэргэ ыытаҕыт. Ырыалары муус устар 10 күнүттэн – ыам ыйын 10 күнүгэр диэри ылабыт. Ситиһиилэри!

Түмүктээһин уонна кыайыылаахтары наҕараадалааһын ыам ыйыгар Ньукуолун саҕана ыытыллыаҕа.

Тэрийэр бөлөх.

Тарҕат:

Сэҥээриилэр

Анна-Арылы Кустук
-2 Анна-Арылы Кустук 16.04.2021 18:39
Элбэх ааҕааччы сэҥээриитин ылбыт кыайыылаах кыргыттарбытын эҕэрдэлиибин! Маладьыастар! Сити курдук ситиһиилээх, куруук инникигэ, чаҕылхай сулуска дьулуһуҥ!
Ответить

Санааҕын суруй

Бүтэһик сонуннар