Муус устар 27 күнүгэр Саха өрөспүүбүлүкэтин күнүгэр, үөрүүлээх быһыыга-майгыга Саха сирин судаарыстыбыннаһын олохтообут дьонтон биирдэстэригэр – Платон Алексеевич Ойуунускай пааматынньыгар тыыннаах сибэкки дьөрбөтүн ууруу сиэрэ-туома ыытылынна, диэн иһитиннэрэр өрөспүүбүлүкэ бырабыытылыстыбатын уонна аҕа баһылыгын пресс-сулууспата.
99 сыл аннараа өртүгэр, 1922 сыл, муус устар 27 күнүгэр, Бүтүн Арассыыйатааҕы киин толорор кэмитиэт Саха Автономной Социалистическай Сэбиэскэй өрөспүүбүлүкэтэ РСФСР састаабыгар киирбитин биллэрбитэ.
Өрөспүүбүлүкэ аҕа баһылыга бэлиэтээбитинэн, бу күн Саха сирин олохтоохторо төрөөбүт дойдуларын иһин турууласпыт чулуу дьонноругар сүгүрүйэллэр, сырдык ааттарын ахталлар, аҕа баһылык биир дойдулаахтарыгар бары бииргэ дойдубут үүнэрин-сайдарын туһугар иннилэрин диэки баран иһэллэригэр истиҥ махталын биллэрдэ, чэгиэн доруобуйаны, барҕарыыны, ситиһиини баҕарда.
«Оччолорго Саха сирин сайдар инниктин түстэспит, олук уурсубут норуот киэн тутттар чаҕылхай уолаттардаах буолан, саха норуота тумус туттар дьонноох буолан, Саха сирэ бэйэтэ бэйэтин салайар кыахтаммыта уонна судаарыстыбыннас чиҥ таһымын ылбыта, духуобунас, үөрэх, билим, успуорт өртүнэн сайдыылаах дойду биир сайдыылаах, киэн туттар киинэ буолбута», - диэн бэлиэтээтэ Айсен Николаев.
Тыыннаах сибэкки дьөрбөтүн уурууга кыттыыны итиэннэ ыллылар миниистирдэр, дьокутааттар уонна уопсастыбыннай диэйэтэллэр.
