Маай бырааһынньыктарын кэмигэр өрөспүүбүлүкэҕэ итирдэр утахтары атыылааһыны хааччахтаабаттар. Буоларын курдук күнүс 14 ч. киэһэ 20 ч. дылы атыылыахтара.
Бу туһунан өрөспүүбүлүкэ урбааҥҥа министиэристибэтэ иһитиннэрэр. "Саха сиригэр ыам ыйын 1-10 күннэригэр арыгы атыытыгар эбии хааччахтааһыннар киирбэттэр", - диэн пресс-сулууспаҕа бэлиэтииллэр.
Былырыын хоруона хамсыгынан сибээстээн атырдьах ыйын 1 күнүгэр дылы итирдэр утахтары киэһэ 18 ч. дылы атыылыы сылдьыбыттара. Санатар буоллахха, быйыл Тыва киин куоратыгар - Кызылга арыгы атыытын маай бырааһынньыктарын кэмигэр кытаанахтык боппуттара.
