Киир

Киир

Бэҕэһээ, муус устар 29 күнүгэр, Бэчээт Дьиэтигэр Суруналыыстар Сойуустарын бэрэссэдээтэлэ Галина Бочкарева көҕүлээһининэн саха бэчээтин тула төгүрүк остуол буолан ааста.

Төгүрүк остуолга сахалыы тылынан суруйар суруналыыстар, Уус Алдан улууһун баһылыга Алексей Федотов, Мүрү нэһилиэгин баһылыга Василий Аммосов, СӨ Инновацияҕа уонна сыыппара сайдыытыгар министиэристибэтин СМИгэ уонна бэчээккэ судаарыстыбаннай бэлиитикэ салаатын салайааччы Станислав Софронов кытыннылар. Быйыл сахалыы тылынан официальнай хаһыаттар тахсыбыттара 100 сылын бэлиэтиибит. Онуоха бырабыыталыстыба таһымнаах хамыыһыйа тэриллэн, сыл устата барар тэрээһиннэр торумнаммыттара. Хамыыһыйаны зампред Сергей Местников салайар. Туох-ханнык тэрээһиннэр ыытыллаллара билигин сөбүлэһиигэ сылдьар. Ханнык тэрээһиннэр ыытыллалларын туһунан сиһилии Станислав Софронов уонна Галина Бочкаерва билиһиннэрдилэр. От ыйын 1 күнүгэр, национальнай бэчээт бэлиэ күнүгэр сөп түбэһиннэрэн үгэс буолбут суруналыыстар ыһыахтара ыытыллыаҕа. Араас быыстапкалар, десаннар эҥин буолуохтара. Үөһээ Бүлүү Харбалааҕар суруналыыстар десаннарын чэрчитинэн күүлэй ыытыллыаҕа.

IMG 20210428 WA0014

Суруналыыстар социальнай өттүнэн көмүскэллээх буолуулара билиҥҥээҥи диэри ситэ быһаарылла илик. Хамнас кырата, суруналыыстар ханнык да эйгэҕэ сыһыарыллыбакка көйгөтүллэн хаалыылара, каадыр боппуруоһа уо.д.а. кыһалҕалар бу төгүрүк остуолга эмиэ таарылыннылар. Маны таһынан сахалыы бэчээт сайдыытын, аныгы үйэҕэ кумааҕы хаһыаттар дьылҕалара уо.д.а. тула сэһэргэстилэр.

Маны таһынан, 2022 сылга Уус Алдаҥҥа ыытыллар Саха сирин норуоттарын оонньууларын сырдатыы, уопсайынан, бу улахан тэрээһиҥҥэ уус алданнар хайдах бэлэмнээх олороллорун туһунан кэпсээтилэр. 

 

Тарҕат:

Санааҕын суруй