Киир

Киир

Кэнники 10 күҥҥэ өрөспүүбүлүкэ иһинэн хат сылдьар  уонна төрөөн баран сылдьар дьахталларга хамсыгынан ыалдьыы таһыма үс төгүл улаатта.

Ол туһунан вице-премьер Ольга Балабкина телеграм-ханаалыгар, Саха сирин Доруобуйатын харыстабылын министиэристибэтигэр сигэнэн иһитиннэриллэр.

Бүтүннүүтэ, хамсык хара саҕаланыаҕыттан өрөспүүбүлүкэ үрдүнэн 1064 хат дьахтар хамсыгынан ыалдьыбыта биллибит. Өрөспүүбүлүкэҕэ Доруобуйа Харыстабылын сүрүн акушер-гинеколога Екатерина Ушницкая иһитиннэрэринэн, бүгүҥҥү күн туругунан Саха сиригэр 34 хат уонна төрөөбүт дьахтар хамсык диэн туруоруллубут диагнозтаах эмтэнэ сылдьаллар.

«“Саха сиринээҕи өрөспүүбүлүкэ килииникэ балыыһатын” иһинэн үлэлиир Перинатальнай Кииҥҥэ үлэлиир мэдиссиинэ үлэһиттэрэ кэтээн көрүүлэринэн, хамсыгынан ыалдьыбыт төрүүр дьахталлар үс гыммыт биирдэригэр, ыарыы пневмонмя арыаллаах ыараханнык ааһар», - диэн этиллэри иһитиннэриигэ.

Исписэлиистэр бэлиэтииллэринэн, хат дьахталлар ыарыыга бэринимтиэлэрэ сүрүннээн кинилэр иммунитеттара, сүрэхтэрин-тыҥатын үлэлэрэ уларыйыытыттан итиэннэ олохсуйбут бэйэлэрин ыарыылара баалларыттан буолуон сөп диэн быһаараллар.

Ыараханнык ыалдьыбыт төрөөрү сылдьар уонна төрөөбүт дьахталлары эмтээһин -  ураты. “Академик В.И. Кулаков аатынан акушерствоны, гинекологияны уонна перинатологияны чинчийэр Национальнай мэдиссиинэ чинчийэр киинин” исписэлиистэрин кытары үлэлэһэн, күн ахсын тиһигин быспакка ыытылар телемедицинскэй консультация ньыматынан.

Ону таһынан бэлиэтиэҕи баҕарыллар, хамсыгы утары быһыы төрөөрү сылдьар уонна номнуо төрөөн оҕолорун эмиий үүтүнэн аһатар ийэлэргэ көҥүлэммэт.

«Ийэ буолуон баҕарар, былааннанар дьахталларга, хат буолуохтарын үс ый иннинэ хамсыгы утары быһыыны ыларгытыгар сүбэлиибит. Ийэ буолуохтаах дьахтары ыарыыттан көмүскүүр туһуттан, кини чугас эргимтэтин, дьиэ кэргэнин эмиэ кэмигэр хамсыгы утары быһыыны ыларгытыгар сүбэлиибит», - диэн этиллэр иһитиннэриигэ
Тарҕат:

Санааҕын суруй