Ил Дархан уонна бырабыыталыстыба дьаһалтатын пресс-сулууспата иһитиннэрэринэн, тутулла турар Жатайдааҕы судоверфь (суудуналары тутар собуот) тутуутугар оробуочайдар тиийбэттэр.
Тутуу хаамыытын бырабыыталыстыба бэрэссэдээтэлин бастакы солбуйааччы Дмитрий Садовников билсибит..
“Тутуу билиҥҥи хаамыытыттан астымматым. Бу маай бырааһынньыктарыгар оробуочайдар быстах кэмнээх уоппуска ылан сынньана барбыттар, ону тоҕо эрэ үлэни биэрээччилэр көҥүллээбиттэр. Тутуу үгэннээн турдаҕына маннык дьаһанар табыллыбат”, - диэн тойон Садовников сөбүлээбэтэҕин биллэрбит.
Бу иннинэ өрөспүүбүлүкэ салалтата графиктан хаалыыны туоратарга, тутууну тэтимирдэргэ сорудахтаабыта. Дьиҥэ, бу тутууга 140 киһи үлэлиэхтээх эбит да, баара-суоҕа 60 эрэ киһи үлэлии сылдьар. Бүгүн эбии 10 киһи үлэлии тахсыахтаах, ыам ыйын 20 күнүттэн монтажниктар биригээдэлэрэ тахсыахтаах. Дмитрий Садовников этэринэн, тутууга өссө 30-ча каменщик наада эбит. Графиктан хаалыыны ситиһэргэ үлэһиттэр иккилии симиэнэннэн үлэлиэхтэрэ. Тутуу хаамыытын өрөспүүбүлүкэ салалтата кыраҕатык кэтээн көрөр.
