Ил Түмэн 35-с пленарнай мунньаҕар Эдьигээн улууһун Лиинди нэһилиэгин “национальнай эбэҥки” ыстаатыстанарын ылынна.
Нэһилиэк олохтоохторо национальнай ыстаатыһы иҥэрэллэрин туһунан былырыын муус устар 10 күнүгэр уопсай мунньахха быһаарыммыттара. Ону Эдьигээн эбэҥки национальнай улууһун дьокутааттарын Сэбиэтэ (Сугулаан) уонна Лиинди нэһилиэгин дьокутааттара бигэргэппиттэр.
Санатар буоллахха, Лиинди нэһилиэгэр национальнай ыстаатыһы биэрэр туһунан боппуруоһу өссө ааспыт сыл алтынньы 2 күнүгэр көтөхпүттэрэ. Маннык ыстаатыс аҕыйах ахсааннаах хотугу омук түөлбэлээн олорор сиригэр тылы, култуураны, экэниэмикэни, төрүт дьарыгы харыстыырга, сайыннарарга кыах биэрэр.
Лиинди нэһилиэгин сиригэр-уотугар былыр-былыргыттан дьоохулар, оһоҕостоохтор, чордулар уо.д.а. булдунан, балыгынан, таба иитиитинэн дьарыктанар тоҥус көс уустара олорбуттара. Билигин нэһилиэккэ 265 киһи олороруттан, 230-та – эбэҥкилэр. Өскөтүн нэһилиэк уопсай ахсааныттан 30 %-на хотугу аҕыйах ахсааннаах омук бэрэстэбиитэлэ буоллаҕына, “национальнай” ыстаатыһы биэрэллэр.
Лиинди нэһилиэгэр 9 кылаастаах оскуола, “Тугутчаан” оҕо саада, дизельнэй электростанция, ДьУоХХ филиала, почта, ФАП уонна “Сахателеком” ААУо филиала үлэлииллэр.
