Иннокентий Тарбахов: - Сымыйа сураҕы итэҕэйимэҥ!
Биллиилээх шеф-пуобар Иннокентий Тарбахов бэрэстэбиитэллэрэ кини өлбүтүн туһунан сурахтары мэлдьэстилэр. Тарбахов кэллиэгэтэ Светлана Львова этэринэн, бу иһитиннэрии - туос сымыйа. Львова албын сурахха итэҕэйбэккитигэр көрдөстө.
«Сымыйа сураҕы тарҕатан бүтүн, түксү! Кини тыыннаах. Хайдах итинник сидьиҥ сураҕы тарҕатыахха сөбүй? Аньыы!» - диэн кыһыытын-абатын биллэрэр шеф-пуобар кэллиэгэтэ.
Тарҕаммыт сымыйа иһитиннэрии кэнниттэн, Тарбахов инстаграммыгар кини аатыттан илдьит сурук тахсыбыта.
«Бу ааспыт икки күҥҥэ батсаапка хара санаалаах дьон мин өлбүтүм туһунан сымыйа сурах бөҕө тарҕаттылар. Онтон мин бэйэм да, чугас дьонум даҕаны олус хомойдубут. Бар дьоммуттан көрдөһүөхпүн баҕарабын, ити сымыйа сураҕы салҕыы тарҕатымаҥ, ол оннугар миэхэ түргэнник үтүөрэрбэр баҕарыҥ!», - диэн суруллар илдьиккэ.
2021 сыл олунньутугар Тарбаахап кэргэнинээн иккиэн хамсыгынан ыалдьыбыттарын туһунан кэпсээбиттэрэ. Ыарыы сабыдыала эмтэнии да кэнниттэн ыарахан этэ, диэн кини суруйбута. Ол иһин биллиилээх асчыкка уонна кини олоҕун аргыһыгар “өр кэмҥэ чөлүгэр түһүүү” ирдэнэрэ булгуччулаах этэ.
Иннокентий Тарбахов – “Тыгын Дархан” эрэстэрээн шеф-пуобара. Арассыыйа Федерациятын эргиэнин Үтүөлээх үлэһитэ, Саха сирин эргиэнин бочуоттаах үлэһитэ. «Арассыыйа потребкооперацията сайдыытыгар кылаатын иһин» уордьанынан, Национальнай ас бырапагаандытын иһин Франция Кулинарнай академиятын бэлиэтинэн наҕараадаламмыта, Нам уонна Таатта улуустарын бочуоттаах гражданина.
2014 сыллаахха Иннокентий Тарбаховка Өксөкүүлээх Өлөксөй аатынан Саха сирин судаарыстыбыннай бириэмийэтэ туттарыллыбыта, лауреат аата иҥэриллибитэ, национальнай куухуна сөргүтүүтүн, сайыннарыытын, бырапагаандатын иһин, эдэр уопсастыбыннай аһылык эйгэтигэр ыччаты уһуйууга кылаатын иһин уонна өр сыллаах үтүө суобастаах үлэтин иһин.
Иннокентий Тарбахов сааһа - 77.
