Киир

Киир

 

Дьокуускай куораттааҕы суут Арктическай судаарыстыбыннай агротехнологическай үнүстүтүүт урукку ректорыгар Иван Слепцовка дьиэҕэ олордон көҥүлүн быһыытын атырдьах ыйын 17 күнүгэр диэри уһатта. Иван Слепцов боломуочуйатын сиэрэ суохтук туһаныыга уорбаланан киниэхэ холуобунай дьыала көбүтүллүбүтэ.

Ыам ыйын 17 күнүгэр силиэдэбэтэл сууттан хадатаайыстыбатын көрөллөрүгэр көрдөспүтэ, тоҕо диэтэххэ Слепцову дьиэҕэ олордон көҥүлүн быһыыга тиэрдибит быһыы-майгы уларыйбатах, сотуллан хаалбатах. Буруйданааччы албакаата хадатаайыстыбаҕа аккаастыырга, уонна хааччахтааһын атын көрүҥүн таларга көрдөспүтэ.

«Суут, силиэдэбэтэл тиксэрбит матырыйаалларын үөрэтэн баран, суут быһаарсыытын кыттыылаахтарын истэн баран, буруйданааччыга дьиэҕэ олордон көҥүлүн быһыытын үс ыйга уһатан биэрдэ», - диэн иһитиннэрдилэр суукка, ыам ыйын 7 күнүгэр эрдэттэн ыытыллар силиэстийэ өссө үс ыйга уһатыллыбытын бэлиэтээн туран.

2021 сыл, олунньу 17 күнүгэр суут Иван Слепцову дьиэҕэ олордон көҥүлүн быһыыга көһөрбүтэ. Урукку ректор 2020 сыл сэтинньи 26 күнүгэр тутуллан, көҥүлэ быһыллан хаайыллыбыта.

Иван Слепцов туһугар Арассыыйа Федерациятын Холуобунай Кодексын 285 ыстатыйатынан, 3 чааһынан холуобунай дьыала көбүтүллүбүтэ. (дуоһунастаах боломуочуйаларын сиэрэ суохтук туһанан ыар түмүккэ тиэрдии).

Арктическай судаарыстыбыннай агротехнологическай үнүстүтүүт Арассыыйа Федерациятын Тыатын Хаһаайыстыбатын министиэристибэтин салайыытын иһинэн сылдьар уонна Арассыыйа хотугу өртүгэр исписэлиистэри бэлэмнээһининэн дьарыкатанар. Иван Слепцов бу дуоһунаска 2016 сылтан үлэлээн олорбута. Ол кэмтэн ылата, силиэстийэ сабаҕалааһынынан Слепцов кэллиэгэлэрин кытары тэрилтэ докумуоннарыгар бу үрдүк үөрэх кыһатыгар 136 устудьуон туттарсан киирэн үөрэнэ сылдьалларын туһунан сымыйа сибиэдэнньэлэри киллэрэ олорбут, дьиҥ дьиҥэр ол устудьуоннар биир да күн бу үөрэххэ үөрэммэтэхтэр. Төрдүс куурустан, устудьуоннар бадаҕа үөрэхтэригэр ситиспэтэх аатыран «үүрүллэллэр» эбит. Ректор дьайыылара, силиэдэбэтэллэр ааҕалларынан Арассыыйа Тыа Хаһаайыстыбатын министиэристибэтиттэн анаммыт 250 мөлүйүөнтэн тахса бүддьүөт харчытын сиэрэ суох ороскуоттааһыҥҥа тиэрдибиттэр.

Саха сирин Аҕа баһылыга Айсен Николаев, Слепцов тула буолбут быһыыны-майгыны «үчүгэйэ суоҕунан» аахта уонна силиэстийэ силиэстийэ туруорсар буруйдааһыннарын дакаастыан наада диэн эттэ. Саха сиринээҕи «Биир Ньыгыл Арассыыйа» эрэгийиэннээҕи салаата Слепцов паартыйаҕа чилиэнистибэтин тохтотто.

Тарҕат:

Санааҕын суруй