Полиция 26-саастаах Дьокуускай куорат олохтооҕун тутта. Эдэр киһи бородуукта маҕаһыынын хассыырыгар саба түһүү оҥорбут. Уорбаланааччы быһахтаах сылдьыбыт, диэн иһитиннэрэр Саха сиринээҕи ИДЬМ пресс-сулууспата.
Кыһыл спортивнай көстүүмнээх итирик эр киһи түүн икки чаас саҕана, Дзержинскэй уулуссатыгар турар төгүрүк суукканы быһа үлэлиир бородуукта маҕаһыыныгар киирэн кэлбит. ИДЬМ пресс-релиһигэр бэлиэтэммитинэн, кини эмсэҕэлээччигэ ынан кэлэн баран эппит: “Арай мин эһигини билигин кыратык кэйгиэлээтэхпинэ?”
“Этэрин бигэргэтэн итирик киһи хаста да быһахтаах хассыыр диэки дугдуруҥнаабыт. Үлэһит уолуйбакка хата харабылы ыҥырбыт. Харабыл итириги таһырдьа анньыалаан таһаарбыт. Ол кэннэ, быһылаан туһунан полицияҕа биллэрбиттэр, ” – диэн тиэртилэр биэдэмистибэҕэ.
Ол сарсыарда халабырдьыты полиция үлэһиттэрэ туппуттар, диэн иһитиннэрэр ИДЬМ пресс-сулууспата. Кини 17 кыбаарталга оптуобус тохтобулугар утуйа сытар эбит.
«Тутуллубут ороспуой тылыттан, саба түһүү кэнниттэн, кини олбуордар устун кэрийбит. Биир дьиэ подьеһыгар киирэн утуйбут, быһаҕын онно хаалларбыт. Дьай оҥоһуллубут тэрилин буллулар уонна былдьаатылар», - диэн эбэн эттилэр ИДЬМ пресс-сулууспатыттан.
«Ороспуой» диэн ыстатыйанан холуобунай дьыала көбүтүлүннэ. Муҥутаан накаастааһын – уон сылга тиийэ көҥүлү быһыы. Уорбаланааччы быстах кэмҥэ тутуллар изоляторга хаайылынна.
