Бүгүҥҥү туругунан Дьокуускай – Аллараа Бэстээх хайысханан 7 паром сылдьар, сотору кэминэн өссө икки парому түһэриэхтэрэ. Айанньыттары мотуордаах оҥочолор туораталлар. Бу туһунан көлө министиэристибэтин пресс-сулууспата иһитиннэрэр.
Министиэристибэ Дьокуускай аннынан муус хонуута устар түгэнигэр паром сырыытын хааччахтыахтарын туһунан сэрэтэр. Билигин муус баттыга Мохсоҕоллоохтон 50 км үөһэ сиргэ устар. Өлүөнэҕэ "ЛОРП" ПАУо Дьокуускайга дылы таһаҕаһы тиэйэр 10 суудуната уонна икки дьуһуурунай суудуна тахсаары бэлэм тураллар.
