Эһиилги үөрэх дьылыгар М.К. Аммосов аатынан ХИФУ 4 тыһ. тахса бүддьүөт миэстэтэ көрүллэр. Бу туһунан университет ректора Анатолий Николаев иһитиннэрэр.
"Кэлэр үөрэх дьылыгар орто анал, бакалавриат, специалитет, аспирантура уонна магистратура бырагыраамаларынар 4154 бүддьүөт миэстэтэ көрүлүннэ", - диир ректор. Абитуриеннар докумуоннарын университет саайтыгар тус кэбиниэт нөҥүө биэриэхтэрин сөп. Маны таһынан Госуслуга уонна Арассыыйа Почтатын нөҥүө. "Универсиет саайтыгар Тус кэбиниэти 2019 сыллаахха арыйбыппыт, билигин ону ситэрэн, толору туһанар гына оҥоруохпут. Үөрэххэ туттарсааччылар докумуоннарын куоппуйалан, сканердаан түбүгүрбэттэр, төлөппүөҥҥэ түһэрэн баран Тус кэбиниэккэ сыһыаран ыыталлар", - диэн тоһоҕолоон бэлиэтээтэ. СКЭ түмүктэрин таһынан, университет эксээмэннэрин эмиэ туттарыахтара, инньэ гынан докумуоннары тутуу от ыйын 15 күнүгэр дылы ыытыллар. Киирии эксээмэннэр дистанционнай ньыманнан ыытыллаллар. Булгуччулаах докумуоннарга бэрэпиискэлээх пааспар, үөрэҕин туоһулуур докумуон, СНИЛС ирдэнэр. Тутуу хампаанньата бэс ыйын 20 күнүттэн саҕаланар. Маны таһынан, Анатолий Николаев уопсайга киирэр устудуьуоннарга буор-босхо ИФА ыытылларын эттэ.
