Дьокуускайга таҥара дьиэтин иһиттэн, сыаналаах маллаах үрүксээги уорууга уорбаланааччыны туттулар, үрүксээги таҥара дьиэтигэр үҥэ кэлбит киһи ыскамыайкаҕа уурбут. Ол туһунан Саха Сиринээҕи ИДЬМ пресс-сулууспата иһитиннэрэр.
Биэдэмистибэ иһитиннэрэринэн, полицияҕа 65-саастаах эр киһи эрийбит уонна киниттэн тирии үрүксээгин уорбуттарын туһунан биллэрбит. Үрүксээк иһигэр тирии хаа иһигэр ачыкы баар эбит. Хорумньуну 8500 солкуобайга сыаналаатылар.
«Сайабылыанньа түһэрээччи этэринэн, кини таҥара дьиэтигэр өрүү сылдьар эбит. Сарсыарда кини үгэс быһыытынан мэлииппэҕэ кэлбит. Бэйэтин тус малларын ыскамыайкаҕа хаалларбыт уонна кэлин мала сүппүтүн көрбүт», - диэн этиллэр иһитиннэриигэ.
Уорбаланааччыны суола сойо илигинэ полиция үлэһиттэрэ сойуолаһан булбуттар. ИДЬМ иһитиннэрэринэн, бу эмиэ таҥара дьиэтигэр үҥэ кэлбит 60-саастаах киһи эбит.
«Түөкүн дьиҥнээх тирииттэн оҥоһуллубут үрүксээги көрбүт уонна тута хара дьай оҥорорго санаммыт. Дьон көрбөтүнэн туһанан малы уорбут уонна таҥара дьиэтиттэн тахсан барбыт. Уорбут сээкэйин батарбакка хаалбыт, чаас иһигэр полиция ботурууллуур үлэһиттэрэ уоруйаҕы тутан ылбыттар», - диэн бэлиэтээтилэр полицияҕа.
Холуобунай дьыала көбүтүлүннэ АФ ХК 158 ыстатыйатынан, 2 чааһынан (уоруу). Муҥутаан накаастааһын – икки сылга диэри көҥүлү быһыы.
