Киир

Киир

Бэс ыйын 22 күнүгэр Арассыыйаҕа Кутурҕан уонна кэриэстэбил күнэ бэлиэтэнэр. Оруобуна 80 сыл аннараа өртүгэр Германия туох да сэрии биллэриитэ суох Сэбиэскэй Сойууска саба түспүтэ.

Бу күн бүтүн Арассыыйа үрдүнэн кэриэстэбил тэрээһиннэрэ ыытыллаллар. Судаарыстыбыннай тэрилтэлэргэ былаахтар түһэрилиннилэр, олорор дьиэлэргэ хара хаймыы лиэнтэлэр баайылыннылар, туох баар аралдьытар тэрээһиннэр бобулуннулар.

Дьокуускай куоракка актыбыыстар «Туймаада саллаата» мемориальнай комплекска ыраастааһын үлэтин ыыттылар. Аахсыйа кыттыылаахтара комплекс олбуорун иһин бөхтөн ыраастаатылар уонна пааматынньыктары сууйдулар. Ол туһунан Саха сирин аҕа баһылыгын уонна бырабыытылыстыбатын саайтыгар иһитиннэрилиннэ.

«Туймаада саллаата» мемориальнай комплекс 2015 сыллаахха, Дьокуускай куоракка, 202 микрооройуоҥҥа бэтэрээннэр искибиэрдэригэр арыллыбыта. Мемориал Дьокуускай куорат байыҥкамаатыттан 1941-1945 сс ыҥырыллан сэриигэ барбыт саха сирин буойуттарыгар анаммыта. Уопсайа комплекс стелатыгар 20 563 киһи аата суруллубут.

Аҕа Дойду Улуу сэриитэ 1418 күн-түүн устата ааспыта. Сэбиэскэй Сойуус бу сэриигэ 27 мөлүйүөн дьонун сүтэрбитэ. Арассыыйаны утары Британияттан ураты бүтүн Европа сэриилэспитэ. Европа оккупацияҕа түбэспит дойдулара Гитлеры кытары актыыбынайдык бодоруспуттара, атыттарыгар – фашистыы эрэсиим олохтоммута. Бэл, ким да диэки буолбатах Швеция уонна Швейцария Үһүс рейхха массыына, сэп-сэбиргэл, ас-үөл биэрэ олорбуттара. 1196 сыллаах, бэс ыйын 8 күнүнээҕи Арассыыйа Федерациятын бэрэсидьиэнин уурааҕынан бу күн официальнайдык Кутурҕан уонна кэриэстэбил күнүнэн биллэриллибитэ.

Тарҕат:

Санааҕын суруй

Бүтэһик сонуннар