Киир

Киир

1960 сыллаах төрүөх Нам улууһун олохтооҕо социальнай ситимнэргэ эр киһилиин билсибит. Онтубут "Манчестер куоракка үлэлиир инженербин" диэн сымыйалаабыт.

Эр киһи Нам дьахтарын өйүн супту сүүйэн ылбыт, күн аайы түүннэри-күнүстэри кэмпилимиэн бөҕөтүн куппут. Биир үтүө күн Дубайтан бэлэх ыыттым диэн үөрдүбүт. Сотору соҕус буолан баран, дьахтарга "тырааныспар хампаанньатыттан" эрийэн "Дубайтан иһэр баһыылканы ыларга 75 тыһ. солк. наада" диэбиттэр. Онуоха дьахтар бэлэҕин ыла охсоору кирэдьиит ылан төлөөбүт. Аҕыйах хонон баран эмиэ эрийбиттэр уонна баһыылка иһигэр дуоллар бөҕө паачыканнан кыстана сытарын эппиттэр, онуоха хайаан да 190 тыһ. солк. төлүүрүгэр ыххайбыттар. Дьахтарбыт эмиэ кирэдьиит ыла сүүрбүт. Онтон сотору буолан баран аны Краснодартан эрийэбит диэн буолбут, аны страховканы төлүүргэ 200 тыһ. солк. төлөнүөхтээҕин эппиттэр. Дьахтарбыт эмиэ кирэдьиит ыла ыстаммыт. Онтон аны баһыылка бэрэбиэркэни ааспатах аатырбыт, онуоха эбии 160 тыһ. солк. төлөнүллүөхтээҕин эппиттэр. Эмсэҕэлээччи дьахтар бу сырыыга 125 тыһ. солк. иэстэһэн ыыппыт.

Бу тухары дьахтар билсибит киһитэ "баһыылкаҕа 50 тыһ. дуоллары уган ыыппытым, ону ыларга туохтан да куттаммакка көрдүүр суумаларын биэрэн ис" диэбит. Ол кэннэ бу түөкүн аны 80 тыһ. солк. көрдөөбүт. Онуоха дьахтар хантан да ылар кыаҕа суох буолан урууларыгар эппит, онуоха дьэ полицияҕа тыллаабыттар. Уопсайа өйүн сүүйтэрбит дьахтар 590 тыһ. солк. ыыппыт.

Оперативнай-ирдиир бөлөх уорбаланааччыны Курскай куораттан тараччы тутан ылбыт. Онтубут отой да 1990 сыллаах төрүөх, Африка биир дойдутун олохтооҕо буолан биэрбит. Хара тириилээх түөкүҥҥэ Арассыыйа ХК 159 ыст. 3 ч. холуобунай дьыаланы тэрийбиттэр, билигин кинини Намҥа аҕалан хаайбыттар, холуобунай дьыала салгыы силисэтийэлэнэр. Бу туһунан өрөспүүбүлүкэ борокуратууратын пресс-сулууспа суруйар.

Тарҕат:

Санааҕын суруй

Бүтэһик сонуннар