Бэс ыйын 28 күнүн сарсыардатыгар Саха сирин балыыһаларыгар 70 хоруона хамсыгар хаптарбыт киһи ыарахан туруктаах реанимацияҕа сыталлар, олортон 17 киһи ИВЛ аппараатыгар холбоммут. Бу дьонтон ким да вакцинаны ылбатах.
"Ыараханнык ыалдьар пациеннар ахсааннарын аччатыахха сөп, онуоха быһыыны эрэ ылыахха наада, билиҥҥитэ бары поликлиникаларга быһыыны биэрэ олороллор", — диэн Ольга Балабкина тоһоҕолоон эттэ. Кини этэринэн, билигин хат дьахталлар ортолоругар балаһыанньа ордук ыарахан. Ааспыт нэдиэлэтээҥҥи балаһыанньаны анаалыстаан баран, хоруона хамсыгын бохсор суһал штаб билиҥҥитэ хат дьахталлар ортолоругар хамсыгынан ыалдьааччы улаата турарын быһаарбыттар, өрөспүүбүлүкэтээҕи перинатальнай кииҥҥэ ыараханнык ыалдьыбыт хат дьахтар киириитэ улааппыт. Онон хат дьахталлар дьиэ кэргэттэрин, бииргэ үлэлиир дьонун туох баар миэрэлэри тутуһалларыгар, вакцинаны ылалларыгар вице-премьер ыҥырда.
