Горнай улууһугар хоруона хамсыгынан ыалдьааччы элбии турарынан уонна быһыыны биэрии хаамыыта бытаанынан, от ыйын 6-11 күннэригэр ыытыллыахтаах Манчаары оонньуулара көрөөччүлэрдээх эбэтэр көрөөччүлэрэ суох ыытылларын бу күннэргэ чопчу быһаарыахтара. Бу туһунан хоруона хамсыгын бохсор өрөспүүбүлүкэтээҕи суһал ыстаап мунньаҕар бүгүн, бэс ыйын 28 күнүгэр Ил Дархан Айсен Николаев эттэ.
Эрдэттэн оонньууларга 7 тыһ. киһи кыттарын былааннаабыттара, кинилэр бары ыалдьыббатырн туһунан анаалыстаах уонна вакциналаах буолуохтаахтар этэ. Ол эрээри, балаһыанньаттан көрөн, оонньуулар ханнык форматынан ыытыллаллара уларыйыан сөп. Айсен Сергеевич Өлүөхүмэҕэ Олоҥхо ыһыаҕа үрдүк таһымнаахтык ыытыллыбыттарыгар махтанна уонна сотору кэминэн Горнайга ыытыллар оонньуулар, улууска ыарыы балаһыанньата бэрдэ суоҕунан, хайдах форматтаах ыытыллалларыгар этиитэ киллэриҥ диэн сорудахтаата. ААспыт икки нэдиэлэҕэ улууска 38 киһи ыалдьыбыт. Өлүөхүмэҕэ ыһыах иннинэ икки нэдиэлэ биир да ыалдьыбыт киһи бигэргэммэтэх, оттон Горнайга бэрдэ суох балаһыанньа тыҥаан турар. Оннооҕор реанимацияҕа ыарахан туруктаах ыарыһахтар киирбит түбэлтэлэрэ баар. Айсен Николаев улууска быһыыны биэрии бэрт мөлтөх көрдөрүүлээҕин эттэ. Онно былаан быһыытынан нэһилиэнньэ 60 бырыһыана ылыахтаах эбит да, билиҥҥитэ нэһилиэнньэ 22,8% быһыыны ылбыт. Киирбит вакцинаттан 85% эрэ туһаммыттар. Айсен Сергеевич "улуустааҕы хамсыгы бохсор штаб уонна тэрийээччилэр ээл-дээл сыһыаннаһар буоллахтарына, оонньуулары отой да тохтотон кэбиһиэххэ наада. Спортсменнар амбицияларын туһугар буолбакка, дьон доруобуйатыгар куттал суоһаабатын бастатан туран болҕомтоҕо ылыахха наада", - диэтэ.
Айсен Сергеевич өрөспүүбүлүкэҕэ вакцинаны биэрии куһаҕана суохтук баран иһэрин бэлиэтээтэ. Ордук хоту улуустарга вакцинаны биэрии үчүгэй: Анаабыр (91% ), Аллайыаха (87%), Муома (86%), Эбээн Бытантай (84%), Эдьигээн (82%), Аллараа Халыма (78%). Оттон Нерюнгри (33%), Таатта, Чурапчы, Амма (40%) улуустарыгар вакцинаны биэрии саамай мөлтөх көрдөрүүлээх.
