Биир нэдиэлэ устата Дьокуускай, Мииринэй, Удачнай, Нерюнгри уонна Ленскэй куораттарын отучча олохтоохторо, угаайыга киллэрэр түөкүттэр сиэртибэлэрэ буоллулар диэн өрөспүүбүлүкэтээҕи ИДЬМ пресс-сулууспата иһитиннэрэр.
Иһитиннэриигэ этиллэринэн, эмсэҕэлээччилэринэн 20 дьахтар уонна 10 эр киһи буолла, түөкүттэр бэйэлэрин баан үлэһиттэрэ уонна брокерскай былаһааккалар бэрэстэбиитэллэрэ дэнэн бу дьону албыннаатылар.
15 түбэлтэҕэ гражданнар кинилэргэ сойуом иэс харчы ылан ыыппыттар, уопсай хорумньу 2,5 мөл.солк. буолбут. Чуолаан, хара санаалаахтар дьайыыларыттан реанимация салаатын сиэстэрэтэ эмсэҕэлээбит, кини түөкүттэргэ 500 тыһ. тахса солк. ыытан улахан хорумньуга түбэспит.
«Дьахтар интернеткэ “Тинькофф” баан сайыҥҥы бырааһынньыктарынан ыытар аахсыйаларын эрэкэлээмэтин көрбүт уонна анкета толорбут. Сотору буолаат, киниэхэ биллибэт киһи эрийэн брокерскай хампаанньа бэрэстэбиитэлэбин дэммит, угуйар этиилэри киллэрэн эмчити интириэһиргэппит», - диэн иһитиннэриигэ этиллэр.
Түөкүн ыйыытынан-кэрдиитинэн дьахтар “брокерскай усчуот” арыйбыт уонна харчытын дуолларга көһөрбүт. Ол кэнниттэн түөкүттэр киниттэн “инвестиция” харчытын көрдөөн барбыттар.
Хойутуу, дьахтар сэрэхэчийэн эрэкэлээмэ скриншоттарын «Тинькофф» бааҥҥа ыыппыт, онуоха дьиҥнээх баан бэрэстэбиитэллэрэ маннык өҥө кинилэргэ олох да суоҕун туһунан эппиттэр.
