Бу Бырагыраама Хампаанньа ыытар үлэтин барытын хабар уонна алмаас-бирилийээн бородууксуйатын оҥорууга эппиэтинэһи үрдэтэр, барытын дьэҥкир-аһаҕас оҥорор уонна бородууксуйаны туһанааччылар итэҕэллэрин ылар соруктаах ылылынна.
АЛРОСА бу ылынар Бырагыраамата стратегическай, ырааҕы өтө көрөр хайысхалаах докумуон, кини хампаанньа үлэлии олорор бигэ бириинсиптэрин уонна үлэҕэ сыһыанын бөҕөргөтөр, бу туһаайыыга систиэмэлээх үлэ ыытылларын көрдөрөр суолталаах.
Бу ылыллыбыт кэлим Бырагыраама чэрчитинэн, Хампаанньа өр болдьохтоох сыалларын-соруктарын, ыытыахтаах тэрээһиннэрин чопчулаан быһаарар. АЛРОСА 2025 сылга диэри сүрүн соруктарыгар 5 тутаах уонна стратегическай хайысха киирдэ:
Тулалыыр эйгэни харыстааһын: 2022 сыл бастакы кыбартаалыгар Экологияҕа уонна килиимэт уларыйыытыгар Хампаанньа стратегиятын оҥорон таһаарыы уонна бигэргэтии. Ол иһигэр, Хампаанньа үлэтин кэмигэр углероду салгыҥҥа таһаарыытын айылҕаҕа дьайбат таһымҥа тиэрдэ кыччатыы, бу үлэни Climate Disclosure Project (CDP) ирдэбилигэр дьүөрэлээһин, Килиимэт уларыйыытыгар сыһыаннаах (TCFD) үп-харчы туһунан информацияны Оробуочай бөлөх ирдэбилин быһыытынан толору тиксэрии.
Хампаанньа үлэлиир эрэгийиэннэрин сайыннарыы: АЛРОСА хампаанньа үлэлиир эрэгийиэннэрин сайдыытын уонна өйөбүлүн бырагырааматыгар хас сыл аайы 10 млрд солк. (130 мөл. дуоллар) ыытар. Ол курдук, социальнай боппуруостарга анаан Хампаанньа бэйэтин өлөрөр сууматын 5 %-нын угар, ити – аан дойдуга алмаас-бирилийээн комплексыгар үлэлиир хампаанньалар ортолоругар барыларыттан үрдүк көрдөрүү. Итини сэргэ, АЛРОСА үлэлиир сирин төрүт олохтоох нэһилиэнньэтэ үлэ миэстэтинэн хааччыллыытыгар ахсаабат кыһамньытын уурар.
Киһи хапытаалын сайыннарыы: Алмаас-бирилийээн эйгэтигэр үлэлиир хампаанньалар ортолоругар АЛРОСА дьахталлары үлэ миэстэтинэн хааччыйыыга баһылыыр-көһүлүүр оруолун салгыы тутан хаалыы (билигин хампаанньа үлэһитин 30 %-на – дьахтар), Хампаанньа үлэһиттэрин уопсай көҕүн, үлэтинэн дуоһуйуутун үрдүк таһымҥа илдьэ сылдьыы.
Үлэ харыстабыла уонна бырамыысыланнай куттала суох буолуу: Хампаанньа үлэһиттэрин эчэйиилэрин-оһоллонууларын букатын суох оҥоруу, LTIFR көрдөрүүтүн 10 % кыччатыы.
Корпоративнай салайыы уонна дьыалабыай этика: сылын аайы алмаас-бирилийээн бородууксуйатын хааччыйыы олоҕурбут кэтээн көрөр процедуратын 100 %-ҥа тиэрдии.
Уопсайынан ыллахха, АЛРОСА “саамай суолталаах” диэн ылыныллыбыт соруктартан 24-дү толорорго эбэһээтэлистибэни ылынна, көдьүүстээх буолууну хааччыйар 52 хаачыстыба уонна ахсаан көрдөрүүтүн чопчулаата уонна ону олоххо киллэрии сиһилии былаанын оҥордо.
АЛРОСА бигэ тирэхтээх сайдыыта – Саха сирин социальнай-экэнэмиичэскэй сайдыытын хааччыйар мэктиэ.
Алмааһы хостуур бырамыысыланнас билигин үлэлиир эрэгийиэннэрин социальнай-экэнэмиичэскэй балаһыанньаларын тупсарыыга, кинилэр экэниэмикэлэрэ сыыйа аҕыйах углероду туһанар үрдүкү технологияларга көһөрүгэр улахан үлэни ыытар. Ити ордук былырыыҥҥы курдук түөрэккэй уонна эрэлэ суох, хоруона хамсыга турбут 2020 сылыгар ырылыччы көстүбүтэ. Ол да иһин Туруктаах сайдыы бириинсибэ – Хампаанньа сүрүн сыалын-соругун, сайдар стратегиятын, корпоративнавй култууратын биир сүрүн чааһа.
Өскөтүн урукку өттүгэр ити үгэс буолбут ирдэбиллэргэ биһиги судаарыстыбаннай аахсыйалаахтарбыт долгуйар эбит буоллахтарына, кэнники кэмҥэ ESG-фактордары биһиги чааһынай аахсыйалаах дьоммут, тэрилтэлэрбит эмиэ улаханнык болҕойор буоллулар. Ол иһигэр, биһиги хампаанньабыт ESG көрдөрүүлэргэ сыһыаннаах информацията барыта аһаҕас, дьэҥкир буоларын туһугар BlackRock инвестфонд туруорсуута, салгыҥҥа парник гааһын аҕыйатыы туһунан 41 трлн дуоллар актыыптаах аан дойду улахан инвестициялыыр хампаанньаларын Аһаҕас суруга эмиэ киирэллэр. Бу манна биһиги хампаанньабыт миноритарнай аахсыйалаахтарын 20 %-на илии баттаабыттарын санатабыт. Уопсайынан, биһиги тэрилтэбит ис тутулугар сыһыаннаах инвестордар барылара кэриэтэ, аахсыйалаахтарбыт, аахсыйабытын ылыахтарын баҕалаахтар, инвестицияҕа сыһыаннаах боппуруостары көрөллөрүгэр, ESG ирдэбиллэрин бары учуоттууллар.
Туруктаах сайдыы Бырагырааматын чэрчитинэн көрүллүбүт сиһилии былаан соруктарын аттаран баран, АЛРОСА бэйэтин үлэтин-хамнаһын тиһигин быспакка сайыннара, тупсара турарга, аныгы технологиялары баһылыырга, килиимэт уларыйыытын, экология, социальнай эппиэтинэс, корпоративнай салаллыы, салаа иһинэн эйгэни тупсарарга ылыммыт эбэһээтэлистибэтин бигэргэттэ.
“Бу үөһэ этиллибит соруктары олоххо киллэрии биһиги туруктаах сайдыыбыт аан дойдуга барытыгар ылыллыбыт ыстандаартарыгар тиийэригэр, Хампаанньа өссө да өр кэм устата туруктаах буолуутугар бигэ тулааһын буоларын таһынан, үлэлиир эрэгийиэннэрбит социальнай-экэнэмиичэскэй туруктарын тупсарыыны хааччыйыа”, – диэн АЛРОСА генеральнай дириэктэрэ Сергей Иванов бэлиэтээтэ.
ХНТ туруктаах сайдыытын сыалларынан...
АЛРОСА бөлөх ылыммыт бу 5 стратегическай соруктара ХНТ туруктаах сайдыытын 13 сүрүн Сыалларын кытта толору дьүөрэлэһэллэр. Ону тэҥэ, ХНТ Глобальнай дуогабарын 10 тутаах, тирэх буолар бириинсибигэр, Хампаанньа бэйэтин үлэтин чэрчитинэн туруктаах сайдыытыгар, аан дойду таһымнаах партнердуу сыһыаны олохтооһуҥҥа толору сөп түбэһэллэр.
Бу Бырагыраама биисинэһи тэрийии, кэлэктиип иһинэн салалта аан дойдутааҕы ирдэбиллэригэр, ол иһигэр Аан дойдутааҕы алмаас Сэбиэтин (WDC), Ювелир биисинэһигэр эппиэтинэстээх практика Сэбиэтин ыстандаартарыгар олоҕуран, тиһиктээх сайдыы аан дойдутааҕы бастыҥ практикатыгар тирэҕирэн оҥоһулунна.
АЛРОСА бөлөх туруктаах сайдыытын стратегическай көрүгүн уонна соруктарын, Бырагыраама төһө олохтоохтук туолбутун быһаарар туһугар, АЛРОСА АХ Кэтээн көрөр сүбэтин иһинэн үлэлиир Стратегичекай былааннааһын Кэмитиэтин 2021 олунньутугар Стратегия уонна туруктаах сайдыы Кэмитиэтэ диэн уларытан ааттаммыта. Кэмитиэт иһинэн Кэтээн көрөр сүбэ уонна аан дойдутааҕы сүрүннүүр эспиэрдэртэн састааптаах оробуочай бөлөх тэриллибитэ. Кинилэр эбээһинэстэригэр – туруоруллубут сыаллары-соруктары чопчулааһын, үлэ таһаарыытын былааннарын кэтээн көрүү, аан дойдутааҕы бастыҥ холобурдары үөрэтии уонна олор Хампаанньаҕа хайдах олоххо киириэхтэрин сөбүн ырытыһыы киириэхтэрэ.
Ким интэриэһиргээбиккэ анаан, АЛРОСА Туруктаах сайдыытын Бырагыраамата хайдах туолан иһэрин туһунан информацияны хас сыл аайы толору иһитиннэриэхпит.
