Сахалин уобалаһын борокуруорун бастакы солбуйааччытынан үлэлии олорбут Максим Попов биэс сылга Саха сирин борокуруорунан ананна. Онуоха туһааннаах ыйааҕы дойду бэрэсидьиэнэ Владимир Путин бэҕэһээ таһаарда.
Өрөспүүбүлүкэ борокуруора Олег Нарковскай быйыл ыалдьан күн сириттэн күрэммитэ, ол иһин борокуратуураны кини солбуйааччыта Айдар Иванов салайан олордо. 2019 сыл олунньутугар дылы борокуруорунан Николай Пилипчук олорбута, кинини Приморье кыраайыгар ыыппыттара.
Саҥа борокуруорбут Максим Николаевич Попов юстиция ыстаарсай сүбэһитэ чыыннаах. Кини 1980 сыллааха Омскай куоракка төрөөбүт. Омскайдааҕы судаарыстыбаннай университеты юрист идэлээх бүтэрбит. Борокуратуураҕа 2002 сыл муус устарыттан Омскай уобалас Ленинскэй уокуругун борокуратууратын силиэдэбэтэлинэн үлэтин саҕалаабыт. Ол кэннэ Омскай уобалас борокуратууратын ис дьыала уорганнарын уонна юстиция үлэһиттэрин дьарайар отдел борокуруорунан, Омскай куорат Сэбиэскэй административнай уокуругун борокуорун солбуйааччытынан, сууттарга холуобунай дьыалалары көрүүгэ борокуруордар кыттыыларын тэрийии управлениетын судаарыстыбаннай буруйдааһын салаатын начаалынньыгынан, Омскай оройуонун борокуруорунан, Омскай Киин аминистративнай уокуругун борокуруорунан үлэлээбит.
