Сунтаар улууһун Куокунутугар турбут ойуур уотун умулларыыга барбыт үс киһи билиҥҥэ диэри сибээскэ тахса илик.
Нэһилиэк дьаһалтатыгар иһитиннэрбиттэринэн, нэһилиэк баһылыга Леонид Михалев, землеустроитель Сергей Чочанов уонна ыччат исписэлииһэ Иван Егоров буолан от ыйын 1 күнүгэр киэһэ 23:30 ч. саҕана нэһилиэктэн Бүлүү өрүс туһаайыытынан 25 км тэйиччи сытар сиргэ тахсыбыт уоту көрө барбыттар уонна билиҥҥээҥи дылы сибээскэ тахса иликтэр.
От ыйын 3 күнүгэр Авиалесоохрана сулууспата көтө сылдьан үөһэттэн уоту көрө барбыт дьон "Соболь" массыыналарын булбут да, онно дьонноро суох буолан биэрбит. Бүгүн эмиэ үөһэттэн көрбүттэр да, туох да үтүө сурах суох.
Сунтаар улууһун КЧС суһал ыстаабын быһаарытынан, сүппүт дьону көрдүүргэ быыһыыр сулууспа уонна "Шерп" вездеход туруммут. Көмөҕө Ньурба улууһуттан быыһыыр сулууспаны уонна дьону көрдүүр беспилотнигы кэтэһэллэр уонна олохтоох дьон тахсыахтара.
Бу туһунан улуус суһал ыстааба иһитиннэрдэ.
Сэҥээриилэр