Виктор Лебедев өрөспүүбүлүкэтээҕи Национальнай мэдиссиинэ киинигэр доруобуйатын эмтэнэ киирдэ.
Эмсэҕэлээччи Владимир Стрижак этэринэн, Лебедевы көмүскүүр өрүт холуобунай дьыала көрүүтүн тохтоторго көрдөспүт, кини Москваҕа мэдиссиинискэй ыспыраапка ыла көтөн эрэринэн сибээстээн.
Бэйэтин кэмигэр уопсастыбаҕа улахан айдаан таһаарыбыт бу холуобунай дьыала көрүүтүн мөрөбүөй суут 2021 сыл олунньу 1 күнүттэн саҕалаабыта. Билиҥҥи кэм туругунан буруйдааһын өрүттэринэн туох баар дакаастабыллар суукка тиксэриллэннэр, дьыала матырыйааллара бары ааҕылланнар, иһитиннэриигэ тахсыбыттара.
Стрижак этэр: «Мин эмсэҕэлээччи өрүт быһыытынан элбэхтэ доппуруостаммытым. Сымыйаны биллэрэр детектор тургутуутун ааспытым. Итиэннэ, суукка үгүс туоһу дьон бэйэлэрин көрдөрүүлэрин биэрбиттэрэ. Ыам ыйын бүтүүтэ, миигин көмүскүүр өрүт дакаастабыллары биэрэр түһүмэҕэр киирбиппит ».
Ол эрээри, бу кэмҥэ Виктор Лебедев хамсыгынан ыалдьыбыт киһилиин ыкса алтыһан, бэйэни харыстаныы эрэсиимигэр киирэн, суукка хайдах да тиийэр кыаҕа суох буолбут.
Стрижак бэлиэтиир: «Онон сибээстээн, суут холуобунай дьыала көрүүтүн икки нэдиэлэҕэ уһаппыта. Болдьох бүтүүтэ, бэс ыйын 15 күнүн кэнниттэн биллибитинэн, Виктор Лебедев өрөспүүбүлүкэтээҕи Национальнай мэдиссиинэ киинигэр доруобуйатын эмтэнэ киирдэ. Ыарыы хамсыгы кытары ситимэ суох, ол эрээри балайда уустук ыарыы. Суут тохтобулун уһаппыта. Ол кэнниттэн биһиги суукка нэдиэлэҕэ иккитэ мустар этибит, ол тухары Виктор Николаевич үтүөрбэтэҕэ. Ол иһин суут сырыы аайы болдьоҕун уһатан испитэ ».
Кини этэринэн, от ыйын 5 күнүгэр, буруйданааччы Москва куоракка мэдиссиинискэй ыспыраапка ыла көтөрүнэн сибээстээн, Лебедев көмүскүүр өрүтэ холуобунай дьыала көрүүтүн тохтоторго диэн суукка хадатаайыстыба түһэрбитэ.
Эмсэҕэлээччи бэлиэтиир: «Мин бэйэм көмүскүүр өрүппүн кытары албакаат Кононовтыын бу сокуоннай миэрэни утарсыбатахпыт, Виктор Николаевич Москваҕа эмтэнэ баран кэлэригэр. Мин өйдүүбүн, Лебедев эмиэ тыыннаах киһи, кини доруобуйата эмиэ айгырыан сөп. Биһиги кини сотору үтүөрүө диэн эрэнэбит. Ол кэнниттэн холуобунай дьыаланы көрүү салҕанан барыаҕа».
