Быйыл сайын Мииринэй оройуонугар өтөрүнэн буолбатах уот кураан сатыылаата. Улахан ардах сибикитэ биллибэт.
Сарсыардаттан – үкэр куйаас. Мэктиэтигэр киһи тыына бобуллар, сүрэҕэ чаалыйар.Таас дьиэлэргэ олорор дьон кыбартыыраларыгар киһи тулуйбат усулуобуйата.Ордук болкуона суох “хрущевкалар” олохтоохторо эрэйдэнэллэр. Дьиэлэрэ оргуйан олорор. Кытай дьоҕус бэнтилээтэрдэрэ төрүт кыамматтар эбит.Дьон ыксаан сыаналаах кондиционердары атыылаһарга күһэллэллэр. Аны онтулара биир эрэ маҕаһыыҥҥа баар эбит. Атын лааппыларга бэлиэр бүппүт.Маннык итиигэ, ама, нус-хас утуйуоҥ үһү дуо?! Суох!Дьон ыксаан аҕыйах күҥҥэ отгуул ылаллар.Сорохтор даачаларыгар көһөн дуустана-дуустана олороллор.Сорох баай дьон, тус бэйэлэрин кэҥэс бассыайыннарыгар, сөрүүккүү сыталлар.Массыыналаах норуот Чуоналыыр күөлүттэн (куораттан 12 биэрэстэ) букатын арахпат.
Бу күннэргэ Эбэ уута ыаммытынан үүт курдук сылаас. Уута ыраас, түгэҕэ - кумах.Сорох дьон Оччугуй Ботуобуйа үрэҕэр - Маайыскай сөтүөлүүр сиригэр (куораттан 20 биэрэстэ) бараллар.Онно – массыына үөһэ массыына, Оччугуй Ботуобуйа үрэҕин кытылын, быыһа суох сабардаан тураллар.Киһи тобус-толору. Үрэх уута кыра сүүрүктээх, сөрүүн. Бэртээхэй.Дириҥэ орто уҥуохтаах киһини түөһүн тылынан.Онон, дьэ чалымааттаныы!Ким эрэ эрэһиинэ уунан хатааһылыыр. Ким эрэ ууга тимирбэт матарааһынан устар.Сөтүө быыһыгар дьон шашлыыктыыллар, итирдэр утахтары да сирбэттэр. Бытыылка арааһа үрэх кытылларынан оҕуруо курдук ыһылла сытар, бөх-сах гынан иэдэтэн эрэллэр. Маны олохтоох былаастар көрүөхтэрин, дьарыйыахтарын наада этэ.
Станислав Алексеев, Мииринэй куората.
