Манчаары Оонньууларын чэрчитинэн буолан ааспыт «Кырсаада Куо» күрэххэ, Горнай улууһуттан сылдьар Милена Парфенова кыайыылааҕынан биллэрилиннэ.
11 саамай кыраһыабай, талааннаах, спортсменка кыргыттар бу ураты күрэххэ актыыбынай кыттыыны ыллылар: Влада Суздалова (Өлөөн улууһа), Аэлита Дмитриева (Бүлүү улууһа), Александрина Оконешникова (Орто Халыма улууһа), Дайаана Маркова (Мэҥэ-Хаҥалас улууһа), Саина Степанова (Горнай улууүа), Любовь Карадчина (Үөһээ Бүлүү улууһа), Карина Постникова (Горнай улууһа), Дария Горохова (Үөһээ Дьааҥы улууһа), Милена Парфенова (Горнай улууһа), Дарина Анисимова (Өлүөхүмэ улууһа), Полина Абрамова (Муома улууһа).
Куонкурус усулуобуйатынан кэргэн тахса илик 16-ларыттан 25-гэр диэри саастаах эдэркээн кыргыттар кытыннылар. Бу спортсменкалар, успуорт араас көрүҥнэринэн дьарыктаналлар, бу эйгэҕэ кэккэ ситиһиилэрдээхтэр. Кинилэр ортолоругар успуорт маастардара бааллар, кросфитт күрэҕин кыайыылаахтара, волейбол, чэпчэки атлетика сүүмэрдэммит хамаандаларын чилиэттэрэ, уһуйааччы-тириэнэрдэр.
Бастакы түһүмэххэ кыттаачылар тус бэйэлэрин видео устуу нөҥүө билиһиннэрдилэр, ханна үөрэнэллэрин, үлэлииллэрин кэпсээтилэр, иллэҥ кэмнэригэр ханнык успуорт көрүҥүнэн дьарыктаналларын кэпсээтилэр.
«Талаана Куо» түһүмэххэ кыргыттар үҥкүүлээн, ыллаан көрдөрдүлэр.
Онтон кэлэр түһүмэххэ кыргыттар успуорт көрүҥнэригэр пуормаларын көрдөрдүлэр. Куонкурус саамай долгутуулаах түгэнинэн «Кыыс быһый» - диэн 200 миэтэрэҕэ сүүрүү буолла. Бастакынан финишка Александрина Оконешникова сүүрэн кэллэ, иккиһинэн Дайаана Маркова, үһүс үчүгэй түмүгү Аэлита Дмитриева көрдөрдө.
Күрэх кыргыттар сыанаҕа киэһээҥҥи былааччыйанан тахсан киэркэйбиттэринэн түмүктэннэ. Бастакы өрөспүүбүлүкэтээҕи успуорт уонна кэрэ көстүү күрэҕин кыайыылааҕынан таҕыста – Горнай улууһуттан сылдьар Милена Парфенова. Киниэхэ “Кырсаада Куо - 2021” үрдүк аатын иҥэрдилэр. Кыайыылаах кэрэ куоҕа көһө сылдьар кыайыылаах хоруонатын туттардылар, итиэннэ 100 тыһ. харчынан сэртипикээтинэн наҕараадаланна.
«Кырсаада Куо» куонкуруска бастакы вице аатын ылла Бүлүү улууһуттан сылдьар Аэлита Дмитриева. Иккис вице аатын ыллыа Мэҥэ-Хаҥаластан төрүттээх Дайаана Маркова.
