Быйыл саас уонна сайын саҕаланыыта, Мииринэй оройуоннааҕы балыыһатын дьаныардаах үлэтин түмүгэр, хамсыгынан ыалдьыы букатын кыччаан испитэ.
Сорох күннэргэ, букатын ыарыы көстүбүтэ бэлиэтэммэтэх да кэмнэрэ бааллара.
Эрэсиим биллэ сымнаабытын түмүгэр, хоруона хамсыга Мииринэйгэ кыччаан иһэн, эмиэ сытыырхайан турда.
Биэс, түөрт, үс утуу-субуу ыалдьыталаабыт дьон – бу кэнники сыыппаралар.
Онон, Мииринэй улууһа хоруона ыарыыга сутуллуу өрөспүүбүлүкэтээҕи хомуур статистикатыгар, кэлин эмиэ ахтыллар буолла.
Хомойуох иһин, дьаҥы утары охсуһууну дьон төрүт ааххайбат.
Ленин болуоссатыгар, таҥара дьиэтин искибиэригэр, фонтан аттыгар ыччат, оҕо-аймах тобус-толору. Түүннэри куорат олоҕо «оргуйан олорор». Эдэр дьон бөлөҕүнэн сылдьар.
Кафелар, киоскалар гамбургер, пицца, шаурма, шашлык атыылыы олороллор.
Мииринэйгэ, дьон тоҕуоруһар сирдэригэр, мааскалаах дьону сэдэхтик көрөҕүн. Маҕаһыыннарга эмиэ соннук хартыына. Кыһамматтар.
Олохтоохтор, бу уодаһыннаах ыарыыны дьаалайбаттарын түмүгэр, бэйэ-бэйэлэрин хоруона хамсыгынан сутуһа тураллар.
Уодааһыннаах ыарыы туруоҕуттан оройуоҥҥа ниэпкэ-гааска үлэлии кэлэр баахта үлэһиттэрин сыныйан туран бэрэбиэркэлииллэр. Кинилэр, Мииринэй олохтоохторун курдук хамсыгы утары быһыы эмиэ ылаллар.
Маны сэргэ, Мииринэй куоратыгар баар хамсыгынан ыалдьыбыт дьону эмтиир стационарыгар, чугастыы сытар Бүлүү бөлөх улуустарыттан ыарахан туруктаах ыарыһахтары аҕалаллар.
Эмчиттэр түбүктэрэ бараммат.
Иллэрээ күн, Мииринэй оройуоннааҕы балыыһатыгар балтараа тыһыынча хамсыгы утары быһыы кэллэ. Иэдээннэх ыарыыны утары охсуһуу салҕанан барар.
Станислав Алексеев
Мииринэй куората. Автор хаартыскалара.
