Дьокуускай дьаһалтатын телерам-ханаала иһитиннэрэринэн, куорат аҕа баһылыга Евгений Григорьев уокуруктааҕы администрация коммунальшиктарыгар уонна көрүүтэ суох хаалбыт харамайдары быстах тутар пууннарыгар, Куорат култуурунай уонна сынньанар пааркатыгар кыыл барбыт дьэллик ыттары тутан, харайар туһунан дьаһал биэрдэ.
Мэр бэлиэтиир: «Миэхэ, дьэллик ыттар тустарынан күҥҥэ уонунан үҥсүү киирэ турар. Төрөппүттэр оҕолорун кытары пааркаҕа күүлэйдиэхтэрин дьаарханаллар, ыттар куорат биир мааны, сынналаҥ сирин ордуу оҥостубуттар».
Дьокуускай куоракка көрүүтэ суох хаалбыт харамайдары быстах тутар пууннарын салайааччыта Екатерина Безрученко быһаарбытынан, пааркаҕа дьэллик сылдьар ыттар бары кэриэтэ бу пуун нөҥүө ааспыттар, анал бииркэлээхтэр. Быстах кэмҥэ тутуу, ыарыыны утары быһыы уонна харайадары аттааһын кэнниттэн, сокуон быһыытынан туттарыллыбыт сирдэригэр төттөрү ыытыахтаахтар.
«Куорат дьоҥҥо ананар, ыттарга буолбатах, ол иһигэр куорат култуурунай уонна сынньанар пааркатыгар кэрэдэк харамайдар суох буолуохтаахтар. Көрүүтэ-харайыыта суох сылдьар дьэллик ыттар үөрдэрэ пааркаҕа суох буолалларыгар суһал дьаһаллары ыларгытыгар көрдөһөбүн» - диэн тоһоҕолоон туран бэлиэтээтэ Григорьев.
Безрученко этэринэн, нэдиэлэ устата Дьокуускай куоракка 64 дьэллик сылдьар ыт тутуллубут, быстах көрөр-харайар пууҥҥа 396 харамай хаайыллыбыт. 51 ыт – ыарыыны утары быһыы ылбыт. Көҥүлгэ 72 харамай ыытыллыбыт.
