Балаҕан ыйын 1 күнүттэн Арассыыйаҕа ыалдьыбыт оҕону көрөн олорууга балыыһа лииһэ төлөөһүн быраабылата уларыйыаҕа. Арассыыйа Федерациятын официальнай саайта иһитиннэрэринэн, маннык босуобуйа кээмэйэ аны үлэ ыстааһытттан тутулуктаах буолуо суоҕа уонна орто хамнас кээмэйинэн 100 % төлөнүөҕэ.
Саайтка сурулларынан: «Арассыыйа бэрэсидьиэнин уурааҕынан, 2021 сыл, балаҕан ыйын 1 күнүттэн, аҕыһыгар диэри саастаах ыалдьыбыт оҕону көрөргө балыыһа лиистэрэ, саҥа быраабылаларынан төлөнөр буолуохтара. Маннык босуобуйа кээмэйэ аны үлэ ыстааһытттан тутулуктаах буолуо суоҕа уонна орто кээмэй хамнас кээмэйинэн 100 % төлөнүөҕэ. Бу сыаллары ситиһэргэ Арассыыйа бырабыытылыстыбата Социальнай Страхование Пуондатыгар 930 мөл. тахса солк. ыытыаҕа».
Быһаарыныы, үлэ биэрээччилэри таарыйыа суоҕа. Балыыһа лиистэрэ быһаччы Федеральнай Социальнай Страхование Пуондатыттан төлөнүөхтэрэ.
«Билиҥҥи кэмҥэ ыалдьыбыт оҕону көрөн олорорго төлөнөр босубуйа кээмэйэ быһаччы хас сыл үлэлээбит ыстааскыттан тутулуктаах. Холобура, 5 сыл үлэлээбит буоллаххына – балыыһа лииһэ, орто хамнаскыттан 60 % төлөнөр, оттон 5-8 сыл үлэлээбит буоллаххына – 80 %. Арай, үлэн уопсай ыстааһа 8 сылтан элбэх эрэ буоллаҕына – балыыһа лииһэ толору 100 % төлөнөр. Эдэр төрөппүттэр биллэн турар оннук ыстаастара үксүлэригэр суох, кыра оҕолор сылга хаста да ыалдьар буоланнар, эдэр дьон больничнайга бараллара үксүүр», - диэн чопчулаан эттилэр Арассыыйа бырабыытлыстыбатыгар.
