Дьокуускай куоракка, атын киһи массыынатын алдьаппыт суоппарга холуобунай дьыала тэрилиннэ. Уорбаланааччы этэринэн, кини массыынатын, атын массыына чалбаҕынан ыһан ааспыт.
Саха сиринээҕи ИДЬМ пресс-сулууспата иһитиннэрэринэн, 30- саастаах эр киһи тутулунна. Кини кэпсээбитинэн, массыынатын сууйан баран суолга тахсан истэҕинэ, атын массыына кини массыынатын чалбах уутунан ыһан ааспыт.
Быһылаан туһунан ИДЬМ пресс-сулууспата салгыы маннык суруйар; «Уорбаланааччы суоппары ситэн ылан суолун бүөлүү турунан кэбиспит. Кинилэр икки ардыларыгар этиһии тахсыбыт. Айдаан кэмигэр, саба түспүт киһи, эмсэҕэлээччи массыынатын кэлин аанын тэппитэ хоммуруйан суол хаалбыт».
Тэбиллибит массыына бас хаһаайына полицияҕа үҥсүү суруйбут, тимир көлөтүн хорумньутун кини алта тыһыынча солк. сыаналаабыт.
АФ ХК 167 ыстатыйатынан, 1 чааһынан (атын киһи малын алдьатыы эбэтэр куорҕаллааһын) 30-саастаах эр киһиэхэ холуобунай дьыала көбүтүлүннэ. Муҥутаан накаастабыл – икки сылга диэри көҥүлү быһыы.
Сэҥээриилэр