Киир

Киир

Бүгүн, Арассыыйа Федерациятын вице-премьера Татьяна Голикова биллэрэринэн, Москва, Санкт-Петербург уонна өссө 15 Арассыыйа эрэгийиэннэрин үгүс дьоно 60 % кэриэтэ хамсыгы утары быһыы ыланнар, уопсай иммунитет олохтонор кирбиитигэр чугаһаатылар.

“Нэһилиэнньэ 60 % хамсыгы утары быһыыны ылбытын учуоттаан, ыалдьа сылдьыбыт дьону ааҕан туран, дойду 15 эрэгийиэннэрэ уопсай иммунитет олохтонор кирбиитигэр чугаһаатылар. Бу Москва, Санкт-Петербург куораттара; Тува, Карелия, Бүрээтийэ, Калмыкия, Алтай, Саха, Коми өрөспүүбүлүкэлэрэ; Московскай, Белгородскай, Сахалинскай, Магаданскай, Архангельскай, Мурманскай уобаластара; Чукотскай уонна Ямало-Ненецкай автономнай уокуруктара”, - диэн эттэ Голикова, Арассыыйа Федерациятын бэрэсидьиэнэ Владимир Путин бырабыытылыстыба чилиэттэрин кытары сүбэ-мунньаҕар.

Уопсай иммунитет

Вице-премьер бэлиэтээбитинэн: «Нэһилиэнньэ 80 % - гар уопсай иммунитет баар буоларын туһугар, биһиги маннык тэтими ыһыктыбакка салгыы баран иһиэхтээхпит. Сэтинньи 1 күнүгэр диэри, Арассыыйа нэһилиэнньэтэ хамсыгы утары саатар бастакы быһыыны ылбыт көрдөрүүтэ бу таһымҥа тиийиитэ, биһиги бастакы сыал-сорукпут».

Итини таһынан, Татьяна Голикова, алта ый аннараа өртүгэр хамсыгынан ыалдьа сылдьыбыт дьон, хаттаан быһыыны ылаллара булгуччулааҕын тоһоҕолоон туран бэлиэтээтэ.

«Бүгүҥҥү күн туругунан, хамсыгы утары бастакы быһыы бастакы компоненын 33,6 мөл. киһи ылла, онон икки компонены барытын 22,6 мөл. киһи, ол эбэтэр бу дьон  быһыы толору кууруһун ыллылар».

Хамсыгы утары быһыы

Голикова чорботон бэлиэтииринэн, гражданнарга бэриллиэхтээх 67 мөл. хамсыгы утары быһыы дозата, 2021 сылга от ыйыттан балаҕаны ыйыгар диэри өрөспүүлүкээҕэ кэлиэхтээх.

Уопсай иммунитет баар буолара ситиһилиннэҕинэ, Арассыыйа олохтоохторо быһыыны сылга биирдэ эрэ ылар буолуохтара.

Вице-премьер этэринэн, чинчийииллэр көрдөрүүлэринэн хамсыгынан ыалдьыбыт киһи этэ-хаана ортотунан алта ый тухары ыарыыны утары охсуһар, чугаһаппат эбит. Оттон тохсус-уон иккис ыйдарыгар номнуо мөлтөөн, киһи ыарыыга ылларымтыа, бэринимтиэ буоларын учуонайдар быһаарбыттар.

«Ол иһин билигин, эпидемия өрө тура сылдьар кэмигэр, Бүтүн Аан Дойдутааҕы Доруобуйа Харыстабылын тэрилтэтэ, ыалдьан бүппүтүн кэнниттэн алта ый буолан баран биирдэ хамсыгы утары быһыыны ыларга сүбэлиир», - диэн бэлиэтээтэ Голикова.

Саха сиригэр, от ыйын 20 күннээҕи туругунан, хамсыгы утары быһыы бастакы компоненын 252 644 киһи ылла. Иккиһин – 195 294 киһи.

Оттон Дьокуускай куоракка, от ыйын 19 күннээҕи туругунан, бастакы быһыыны 95 148 киһи ылла, иккиһин – 73 756 киһи ылла.

Тарҕат:

Санааҕын суруй

Бүтэһик сонуннар