Горнай улууһугар баһаар балаһыанньата сол да ыарахан. Бүгүн, Үлэ уонна социальнай сайдыы министиэристибэтигэр үлэлиир үтүө баҕа санаалаах дьон, салайааччылара Афанасий Постников иилээн-саҕалаан, Горнай улууһугар күдэпчилэнэ турар уот утары охсуһа бардылар.
В.И. Кононов аатынан Капитоновкатааҕы кырдьаҕастарга анаммыт интернат-дьиэ, «Победа» социальнай көмүскэл Ресурснай Киин, Кырдьаҕастары уонна инбэлииттэри көрөр-харайар Өрөспүүбүлүкэтээҕи социальнай-чэбдигирдэр Киин үлэһиттэрэ Горнай улууһун сиригэр-уотугар улахан алдьархайы аҕалбыт ойуур баһаардарын утары охсуһарга ыҥырыы тахсыбытыгар, туора турбатылар. Үтүө санаалаах дьон баһаар буола турар сиригэр минерализованнай сурааһын тардыытыгар кыттыахтара уонна сири-уоту уот быһа барбатыгар кэтээни көрүү үлэтин ыытыахтара.
Бу иннинэ, уоту уодьуганныырга Тааттатааҕы саастарын ситэ илик оҕолор реаблитационнай киинин үлэһиттэрэ көхтөөхтүк үлэлээбиттэрэ. Өрөспүүбүлүкэтээҕи комплекснай инбэлииттэри чөлүгэр түһэрэр киин уонна Өрөспүүбүлүкэтээҕи социальнай көрүү-харайыы комплекснай киин үлэһиттэрэ бэйэлэрин көҕүлээһиннэринэн босхо көмө хомуйан ыыппыттара.
Саха сиринээҕи Үлэ уонна социальнай сайдыы министиэристибэтин пресс-сулууспата
