КОВИД-19 дьаҥын утары охсуһар аналлаах «АЛРОСА» оперативнай штаба “Алмаастаах кыраай” телерадиохампаанньаҕа соччото суох сонуну биллэрдэ.
Мииринэйгэ – 63, Удачнайга -- 23 киһи коронавируһынан ыалдьыбыттара бигэргитилиннэ.
Санатан эттэххэ, хоруона хамсыгыттан «АЛРОСА» 15 үлэһитэ өлбүттэрэ. Билигин, алмаастаах хампаанньа үс үлэһитэ, Мииринэй ковиднай госпиталыгар реанимацияҕа, ИВЛ аппараатыгар холбонон сыталлар.
Саха сирин арҕаа эҥэригэр, балаһыанньа, ааспыт ыйдарга арыый аматык эбит буоллаҕына, атырдьах ыйыгар тосту мөлтөөтө. Ковиднай госпиталь эмиэ туолан хаалла.
Эбиитин, бу дьаҥҥа хаптарбыт ыарахан туруктаах Ленскэй, Сунтаар олохтоохторун Мииринэй ковиднай госпиталыгар аҕалаллар.
Ыараханнык ыалдьыбыттары өрүһүйэр кыах манна – Мииринэйгэ эрэ баар.Дьон, бастаан тымныйбыт курдук, үрдүкү кыраадыстаах балыыһаҕа киирэллэр. Быраастарга, ыарыһахтар быыстала суох хахсыйан сөтөллөбүт, итииргиибит-тоҥобут дииллэр.
Бастакы диагноз – ОРВИ эбэтэр пневмония. Ол эбэтэр сэбиргэхтэтии. Сорох дьон, дьиэлэригэр олорон, аанньа эмтэммэккэ, тыҥаларын 40-50 бырыһыанын хамсыкка сиэтэн кэбиһэллэр. Бу – олус кутталлаах!Бүтэр уһугар, компьютернай томограф (КТ) түмүгүттэн соһуйаллар.
Инфекционист-эмчиттэр, ыалдьыбыт дьон, күөмэйдэриттэн уонна мурунннарын сарыыларыттан мазок ылан, олохтоох иммунологическай лабораторияҕа тургуппуттара, хоруона хамсыга буолан хаалар. Ол анаалыһы, Дьокуускайга, доруобуйа харыстабылын министиэристибэтин иммунологическай лабораториятыгар бигэргэттэрэллэр.
Бу күннэргэ, Мииринэйтэн Дьокуускайга сөмөлүөттэр буруоттан сылтаан көппөккө олордохторуна дьэ хайдах анаалыс түмүгүн ылаллар?! Эмиэ эрэй!
Тыҥаларын, 50-75 бырыһыан сиэппит дьону, ковиднай “кыһыл зона” реанимациятыгар таһаараллар.
Искусственнай вентиляцияҕа холбууллар. Бу дьон олохторугар куттал суоһуура өтө көстөр. Уруккаттан хроническай ыарыылаах, саахардара үрдүк, сүрэхтэрэ мөлтөх дьон тулуйбакка өлөн да хаалыахтарын сөп.
Бу дьон олохторун иһин, Мииринэй эмчиттэрэ, хорсуннук охсуһа сылдьаллар.
Станислав Алексеев,
Мииринэй куората, МЦРб саайтыттан ковиднай госпиталь быраастарын фотота.
