Мииринэйгэ бэнидиэнньиккэ ибир самыыр түстэ. Эрэнэбит – ардах курулаччы кутарыгар!
Бүгүҥҥү күннээҕи туругунан, Саха сирин арҕаа өттүгэр саамай уодаһыннаах, кутталлаах ойуур баһаардара буола тураллар. Бастатан туран Мииринэй оройуонун баһаардарын бэлиэтиэххэ.Айхалтан уон биир биэрэстэ тэйиччи, Марха өрүс баһын салаатын - Чукуукка үрэҕэр эмискэччи кытыастан турбут уот дьону улаханнык куттаата.Айхал волонтердара баһаар кыаҕын ыла илигинэ бэйэлэрин вездеходтарынан тахсан умуруоран барбыттара.Булчут уолаттар – маладьыастар!
«БЕ-200 » амфибия-сөмөлүөт биир күн устата үлэлээн ууну балачча кутта (бу иннинэ Мииринэй пуордуттан Полярнайга көһөн турар).Бу тыа баһаара, Мииринэйдээҕи Айылҕа харыстабылын кэмитиэтин үлэһитэ Егор Сыромятников миэхэ биллэрбитинэн «Кратон» сир аннынааҕы дэлби тэптэрии миэстэтиттэн чугас.
Атырдьах ыйын 9 күнүнээҕи туругунан бу ойуур баһаарын кытыыта умайар. Биир бөдөҥ ойуур баһаара(18-с) Сүлдьүкээртэн икки көстөөх сиргэ кыайан умуллубакка турар.Үөһээҥҥи уот умайа сылдьар маһын эмтэркэйдэрэ туора үрэх сэтиэнэҕэр кыырайаннар баһаардар балаһыанньаларын өссө ыаратта.Уот өрө ыстанар, хаппыт тииттэри өрө хадьырыччы сиэн үөһээҥҥи(“Верховой”) баһаар буолар куттала баар.Оттон олохтоохтор “Авиалесоохрана” үлэһиттэриниин кэҥэс хоруулары хаһыталаабыттара сэлиэнньэни күүстээх уот кимиититтэн быыһаата.
Сүлдьүкээр уоттан букатыннаахтык быыһанна диир өссө эрдэ.Киэҥ Үрэх, Ходуһа, Оҥкучах үрэхтэрин көрдүгэннэрин уохтара харыы илик.
Атын саха дэриэбинэтиттэн – Таас-Үрэхтэн үс көстөөх сиргэ, Дьуҥкуун үрэх баһыгар тыа умайар(44-с баһаар).Урукку курдук буолбатах арыый намыраата. Бүүрүгэ хаалла.
Маны тутатына, гаас-ниэп тэрилтэлэрэ сомоҕолоһон саба тутан кэбиспэтэхтэр.Кинилэргэ буоллаҕа дии бульдозер, тыраахтыр, вездеход, массыына арааһа, вертолет, квадрокоптер, сир араҥатын кэтиир тэриэбэ эгэлгэтэ. Уоту умуруорууга, ол эрэн, хойутаан да буоллар кыттыстылар.
Ааспыт нэдиэлэҕэ, таас-үрэхтэр, оҕонньордуун-уоллуун туруулаһан уонна Чита авиалесоохранатын байыастара көмөлөһөннөр, Кудулаах уонна Билир икки ардыларынааҕы тыа, Хаҥас күөлүн ойуурун баһаара умуруорулуннулар.Ол эрэн, уот куттала син биир ааспат. Көрдүгэнниир.Балары быыстала суох кэтии эрэ сырыттахха сатанар.
Мииринэй куоратыттан 53 биэрэстэлээх Улахан уонна Кыра Өлөҥ, Харыйа үрэхтэр быыстарыгар(14-с баһаар) Таас-Үрэх туһаайыытынан тыа умайда. 5.800 гектар иэннээх сир умайан, тыаттан күл-көмөр эрэ халла. Тахтахаан мастаах тыа билигин да умайа сытар.Куораттан тахсыбыт бульдозердар ойуур баһаара турбут сирин тула хастылар.Мииринэй ойуурун хаһаайыстыбатын салайааччыта Т.П.Калинюк эппитинэн, Мииринэй куоратыттан кэлбит 8 волонтер хорсуннук туруулаһан бэрт элбэҕи оҥордулар.Сүлдьүкээргэ да Таас-Үрэххэ да баһаары кытары охсуһууга төрүт олохтоох дьон тааҥкалара сүрдээҕин абыраата.
Мин, манна Мииринэй оройуонун эрэ буолбакка, түмүкпэр Сунтаар улууһун арҕааҥҥы эҥэригэр балаһыанньаны ахтан аһарыам этэ.
От ыйын 9 күнүгэр, Алмазнайтан биэс биэрэстэлээх сиргэ, Оччугуй Ботуобуйа уҥуор ойуур баһаара кытыастан турбута.Ол баһаар миэстэтэ – Сунтаар улууһун сирэ.Онно, Сунтаартан ойуур баһаарын умуруорар дьоннор суохтар.Биир ый ааста. Аны, Алмазнайтан уон түөрт биэрэстэлээх сиргэ, урукку турбут баһаар салгыытыгар, Оччугуй Ботуобуйа уҥа салаатын - Нэлээт үрэх эҥэрэ умайа сытар.Хакасия Авиалесоохранатын дьоҕус этэрээтэ уодаһыннаах уоту кытары сиһиктэһэр.Икки вездеходтаахтар, бодобуоскалаахтар. Бүттэ уонна тиэхиньикэбит.
Мииринэй аэропуордун көтөр балаһата Оччугуй Ботуобуйа хочотугар тиийэ анньыллар.Оччугуй Ботуобуйа үрэх уҥуор буола турар баһаардар биһигиттэн чугастар. Онон буруо ол диэкиттэн куораппытыгар эмиэ кэлэр.Онон, Мииринэй модун кыахтаах промышленнай тэрилтэлэрэ, итиччэ кыахтаах тиэхиникэлээх эрээри, Оччугуй Ботуобуйа уҥуоругар уот саҥа сириэдийэн эрэрин саба баттаабыттара буоллар хаарыаннаахай тыа кытарарга киэҥник былдьаныа суох этэ.
Сунтаар улууһа Мииринэй оройуонун кытары быысаһар сириттэн адьас чугас Мэйик (Ойууһут) тыата умайар.Бу – биһигиттэн хотугулуу-илин сытар.Үйэ аҥаара оттоммотох үрэхтэр кур лаҥхалара буорахтыы умайар.Маны умуруорар күүс да кыах да суох.Ким да умуруорбат ити баһаардары!Тыа умайар, баһа-атаҕа өссө ханна тиийиэ биллибэт. Мэйиктэн тус илин Сунтаар хочотун үрэхтэрэ саҕаланаллар. Олортон биирдэстэрэ Бүлүүчээн Багдарыына умайбыта ыйтан орто.Эмиэ ыарҕа, сэтиэнэх от дойдута. Мэйиктэн үөһэнэн быһалыы Маар-Күөл сирдэригэр диэри баара-суоҕа – 7 көс.Дьэ ситигирдик, балаһыанньа кытаанах.Саха сирин арҕаа эҥэригэр уодаһыннаах уоту кытары тыҥааһыннаах охсуһуу салҕанан барар.
Станислав Алексеев, Мииринэй куората.
“Pulse mail.ru” саайтан хаартыска
