Дириҥ нэһилиэгин сиригэр-уотугар, Маралыкы үрэх эҥээр, Мэҥэ уонна Чурапчы дьонун-сэргэтин холбоһуктаах күүстэрэ уоту утары охсуһууга киирдилэр.
Айылҕа алдьархайын туоратыыга 300-чэкэ кэриҥэ киһи хабылынна, ол иһигэр үтүө баҕа санаа өртүнэн хомуллубут – 251 киһи, Лесохрана үлэһиттэрэ -- 5 киһи уонна ГАУ «Лесресурс» үлэһиттэрэ – 24 киһи. Кураан күннэр туруулара уонна күүстээх тыал түһүүтэ уоту түргэнник умуруорууну харгыстыыллар. Үлэ кирбиитигэр 12 тыраахтар, 3 таһаҕас тиэйэр массыына, 2 «Урал» вездеход-массыына, 2 – уу баһар массыынаЮ 55 – «УАЗ» массыына, 7 – мотопомпа.
Бэҕэһээҥҥи күнтэн, күүрээннэх үлэ үөһүгэр ыарахан тиэхиньикэ холбосто. Ол курдук уоту кытары охсуһууга 4 трал, 4 бульдозер киирдэ.
Биригээдэлэри саҥаттан саҥа күүстэр кэлэн солбуйаллар, ойуур баһаарын умулларыы тиһигин быспакка бара турар.
Ол курдук 10 киһи Мугудайтан, киин улуус балыыһатыттан, улуус дьаһалтатыттан, үөрэҕирии салалтатыттан, бэтэринээрнэй салалтаттан, ОДЬКХ тэрилтэтиттэн, “Сахаспецтранс”, “Дьулуур” уонна “Хатан” СХПК-ттан дьон бөҕө көмөҕө кэллилэр.
Чурапчы улууһун аҕа баһылыга Андрей Ноговицын тиэрдэринэн: «Маны таһынан Хоптоҕо уонна Мугудай нэһилиэктэрин олохтоохторун, тыа хаһаайыстыбатын салалтатын үлэһиттэрин, олохтоох дьаһалталар күүстэринэн баһаар тиийиэн сөптөөх сирдэриттэн суһаллык кэбиһиилээх оттору быыһаан тиэйиигэ үлэлэр саҕаланнылар. Куттала суох сиргэ номнуо 132 туонна от көһөрүлүннэ».
Улуус салалатата, маннык күчүмэҕэй, аймалҕан күннэргэ, бары бүттүүн биир киһи курдук турбут төрөөбүт Ийэ айылҕаларын уоттан көмүскүүргэ туруммут бар дьонугар махтанар!
«Чурапчы улууһа» олохтоох дьаһалта пресс-киинэ
