Киир

Киир

Ааспыт нэдиэлэ бээтинсэтигэр (атырдьах ыйын 13 күнүгэр) “Кыым” суруналыыстара Горнай улууһун Бэс Күөлүгэр тахса сырыттыбыт.

 Сэлиэнньэ уокка былдьаммыт түөлбэтин көрдүбүт, олохтоохтору, исписэлиистэри кытта кэпсэттибит. Ол иһигэр Горнай улууһун баһылыга Никита Андреевы кытта.

– Билиҥҥи туругунан элэктэриичэстибэ Бэс Күөлүгэр быстах кэмнээх схеманан оҥоһулунна, оттон гаас ыалларга барыларыгар бэрилиннэ, – диэн кэпсээнин саҕалаабыта Никита Викторович. – Дьиэлэрин уокка былдьаппыт олохтоохтор испииһэктэрэ бигэргэннэ. Төһө хоромньу тахсыбытын, төһө олбуор иһинээҕи тутуу уокка былдьаммытын чуолкайдыыр анал хамыыһыйа үлэлии сылдьар. Тыын суолталаах наадаларга социальнай төлөбүр туһунан Ил Дархан дьаһала тахсыбыта. Ол быһыытынан уокка былдьаммыт дьиэлээх-уоттаах хас биирдии киһиэхэ 30-туу тыһыынча солкуобай бэрилиннэ.

– Отучча дьиэ умайбыт түөлбэтэ туох диэн ааттааҕый?

– Итиннэ, сүрүннээн Кэскил диэн ааттаах уулуссаҕа олорбут ыаллар дьиэлэрэ умайбыт. Билигин ити түөлбэҕэ ыраастааһын үлэлэрэ ыытылла тураллар. Ыраастаммыт учаастактарга кумах, буор кутуута саҕаланна. Туһааннаах эйгэ үлэһиттэрэ: “Гаас ситимин чөлүгэр түһэриигэ үлэ ыытыллыаҕа”, – диэн эрэннэрэллэр.

– Элбэх министиэристибэ, биэдэмистибэ үлэһиттэрэ араас хабааннаах үлэлэри ыыта сылдьаллар эбит.

– Бэс Күөлүгэр хас да хамыыһыйа үлэлии сылдьар. Өрөспүүбүлүкэттэн кэлэр үбү таһынан, федеральнай төлөбүрдэр эмиэ көрүллүөхтээхтэр. Холобур, тыа хаһаайыстыбатын министиэристибэтэ анал хамыыһыйалаах. СӨ Ил Дархана Айсен Николаев алдьархай тахсыбыт күнүгэр нэһилиэккэ кэлэн олохтоохтору кытта көрсүбүтэ. Онно Айсен Сергеевич: “Сэлиэнньэ чөлүгэр түһүүтүгэр ирдэнэр бары үлэлэр оҥоруллуохтара, күн сарсыҥҥыттан үлэ саҕаламмытынан барыаҕа”, – диэбитэ.

Сарсыныгар Ил Дархан дьаһалынан анал хамыыһыйа тэриллибитэ. Хамыыһыйа салайааччыта – СӨ бырабыыталыстыбатын бэрэссэдээтэлин бастакы солбуйааччы Дмитрий Бердников. Бу хамыыһыйаҕа бары министиэристибэлэр бэрэстэбиитэллэрин киллэрэн биир сүрүннээх үлэ саҕаланна. Туһааннаах министиэристибэлэргэ бас бэринэр биэдэмистибэлэр бэйэлэрин хайысхаларынан үлэлииллэр. Холобур, ветеринария департамена, “Якутскэнерго”, гаас тэрилтэлэрэ бэйэлэрин хайысхаларынан үлэлэри ыыталлар. Тырааныспар уонна суол хаһаайыстыбатын миниистирэ кэлэн көрөн-истэн барбыта. Ити хайысханан үлэ эмиэ саҕаланна. Уонна тутуу министиэристибэтин бөлөҕө кэлэн күүстээх үлэни ыыта сылдьар. Холобур, хайдах моһуоннаах дьиэлэр тутуллуохтаахтарыгар, учаастак иэнэ төһө буолуохтааҕар, тутуу учаастактарын ыраастааһыҥҥа. Онон биир сүрүннээх, былааннаах үлэ ыытылла турар.

Баһаар куттала өссө да уҕарыы илик. Онон сэлиэнньэни баһаартан көмүскүүр үлэ эмиэ туһааннаах тэрилтэлэринэн ыытылла турар. Олохтоохтор да, көмөлөһө кэлбит да дьон уоту умуруорууга, кэтээн көрүүгэ үлэлииллэр. Дьахталлар да тэрээһин бары үлэлэригэр тэҥҥэ үлэлииллэр.

Улуус дьаһалтатын бары салааларын исписэлиистэрэ араас хамыыһыйалар састааптарыгар киирэн үлэлии сылдьаллар. Холобур, манна тыа хаһаайыстыбатын, үп-экэниэмикэ, тутуу, архитектура управлениеларын исписэлиистэрэ бааллар.

Федор РАХЛЕЕВ.

Тарҕат:

Санааҕын суруй

Бүтэһик сонуннар