Сөмөлүөтүнэн туһаныы чөлүгэр түһэр

“АЛРОСА авиахампаанньа” 2021 сыл бастакы аҥаарыгар дьону таһыытын иэнэ хамсык иннинээҕи таһымҥа төнүннэ.

Мииринэй, 2021 сыл атырдьах ыйын 9 күнэ. – Бу сыл бастакы алта ыйыгар “АЛРОСА авиахампаанньа” 190,1 тыһыынча пассажиры айаннатта. Ол икки сыллааҕы көрдөрүү 96 бырыһыанын ылар уонна ааспыт сыл бастакы ыйыттан 70 бырыһыанынан элбэх.

Бу сыл бастакы аҥаарыгар киин араспысаанньа эриэйсэтин ахсаана (сакаастаммыт эриэйсэлэри аахпакка туран) икки сыллааҕыта тахсыбыт көрдөрүүгэ тэҥнэстэ. Ол – 746 (2020 сыл бастакы аҥаарыгар 470 этэ). Итиннэ эбии эриэйсэлэр орто туолуулара урукку сыллартан быдан үрдүк буолан биэрдэ. Ол эбэтэр, 2019 сыл бастакы аҥаарыгар – 59, 2020 сыл бастакы аҥаарыгар 57 бырыһыан эбит буоллаҕына, билиҥҥи көрдөрүү – 61 бырыһыан. Тохсунньуттан саҕалаан бэс ыйыгар диэри салгын суудуналарыгар көтүү 10,4 чааска тэҥнэспит.

“2019 сыл бастакы аҥаарыгар “АЛРОСА авиахампаанньа” 197,9 тыһыынча пассажиры айаннаппыт. Сыл буолан баран турбут хамсык түмүгэр ити көрдөрүү 114,4 тыһыынчаҕа тиийэ түспүт. Бу сылга икки сыллааҕы көрдөрүү чөлүгэр түспүтэ билиннэ. Онуоха Мииринэйтэн уонна Полярнайтан Москубаҕа диэри уонна төттөрү көтүүгэ Уһук Илин Федеральнай уокурук олохтоохторугар анаммыт субсидиялаах тарыыптар өҥөлөөхтөр. Итини таһынан “Тюмень – Мииринэй – Тюмень”, “Новосибирскай – Дьокуускай – Новосибирскай”, “Москуба – Дьокуускай – Москуба” саҥа эриэйсэлэр киирбиттэрэ элбэҕи быһаарар, – диэн “АЛРОСА авиахампаанньа” генеральнай дириэктэрэ Андрей Гулов билиһиннэрэр. – Тыа баһаардарынан сибээстээн, сүрдээх тыҥааһыннаахтык үлэлии сылдьабыт, уоту умулларааччыларга тиэхиньикэлэри аныыбыт. Ыарахаттары аахсыбакка, бары сулууспалар былааннаах хамсаныыларын хааччыйдыбыт. Ону биһиги пассажирдарбыт болҕомтоҕо ылбыттарыттан үөрэбит эрэ”.

Ыспыраапка

“АЛРОСА авиахампаанньа” Саха сиригэр эрэгийиэннээҕи айаннары, Арассыыйа иһигэр чартернай, СНГ, Азия уонна Дьобуруопа дойдуларыгар аан дойдутааҕы чартернай тиэйиини-таһыыны, мал-сал тиэйиитин хааччыйар, анал авиационнай үлэлэри толорор. Авиахампаанньа Мииринэйгэ уонна Москуба Домодедово авиапортарыгар базаланар. Билиҥҥи кэмҥэ 7 көрүҥнээх 34 салгын суудунатын көтүтэр.