Киир

Киир

Мииринэй оройуоннааҕы балыыһата( МЦРБ) - өрөспүүбүлүкэ улуустарын биир бөдөҥ балыыһаларыттан биирдэстэрэ.

Куораппытыгар поликлиника уонна стационар дьиэлэрэ 1994 сыллаахха тутуллубуттара. Ол кэмтэн ылата, МЦРБ-га Оҕо отделениета эрэ, 2007 сыллаахха хапытаалынай өрөмүөнү барбыта. Бу сайын, от ыйыттан ыла поликлиника өрөмүөннэнэр. Түннүктэр, ааннар, ититии, уунан уонна сылааһынан хааччыйыы тэриллэрэ уларытыллаллар. Өрөмүөн быйылгынан эрэ муҥурдаммат, эһиил стационар иһэ-таһа саҥардыллыахтаах. Регистратура кэҥэтиллиэхтээх.Уопсайынан, кэнники сылларга балыыһа туругар уонна хааччыллыытыгар болҕомто күүһүрдэ. Саҥа роддом былааннанар, офтальмология отделениета арыллыахтаах. Соторутааҕыттан ыла компьютернай томограф, кислород станцията үлэлииллэр. Оҕо балыыһатын, хирургия, терапия отделениеларын триллэрэ саҥардыллыахтаахтар.

Уопсайынан, быйыл Мииринэйгэ Ил Дархан А.Николаев, доруобуйа харыстабылын миниистирэ Е.Борисова кэлэ сылдьаннар, оройуоннааҕы балыыһаҕа саҥардыы үлэтин уталыппакка ыытарга сорук туруордулар, бырабыытылыстыба өттүттэн өйөбүл оҥорорго бэлэмнэрин биллэрдилэр. Ол туһугар, өрөспүүбүлүкэ, Мииринэй оройуонун дьаһалтата уонна «АЛРОСА» хампаанньа үс өрүттээх сөбүлэҥ түһэристилэр.Бу сөбүлэҥ тосхоло - дьэҥкэ. МЦРБ сайдыахтаах. Нэһилиэнньэ эмтэниитигэр усулуобуйа тупсарыллыахтаах.

Мииринэй балыыһатыгар ыаллыы сытар Сунтаар, Ленскэй, Өлөөн, Анаабыр ыарыһахтара эмтэнэ кэлиилэрэ биллэ элбээтэ. Ыарахан ыарыһахтары биһиэхэ ыыталыыллар.Хоруона хамсыга тураатын кытары, Мииринэйдээҕи инфекционнай балыыһа Саха сирин арҕааҥҥы улуустарыттан кэлэр ыарыһахтары эмтиир госпиталь буолла. Манна Ленскэй нефтяниктара, газовиктара, ыаллыы сытар Сунтаар, Ньурба улуустарын олохтоохторо аҕалыллыбыттара. Инникитин МЦРБ Саха сирин арҕаа эҥэрин ыарыһахтарын эмтиир күүһүрдүллүбүт тэрилтэҕэ кубулуйар чинчилээх. Ол туһугар медицинскэй тэрил барыта саҥардыллыахтаах, кыахтаах уонна аныгылыы буолуохтаах.

Бу туһунан, мин өссө 2000 сыллаахха «Мирнинский рабочий» хаһыакка «Не пора ли создать в Мирном Медцентр» диэн суруйан турабын. Ону өйөөн, оччотооҕу МЦРБ кылаабынай бырааһа Михаил Романенко Мииринэй оройуонун дьаһалтатыгар, киэҥ ыҥырыылаах мунньахха тыл этэн турардаах. Онтум дьэ, инники сылларга олоххо киириэх курдук.

 

Станислав Алексеев, Мииринэй куората.

Тарҕат:

Санааҕын суруй

Бүтэһик сонуннар