Балаҕан ыйын 1 күнүттэн дойдубут олоҕор кэккэ уларыйыылар киирдилэр.
Бу күнтэн ыла 7-гэр диэри саастаах оҕо ыалдьан, төрөппүт бүлүтүөҥҥэ бардаҕына, орто хамнас 100 бырыһыан төлөнөр буолуоҕа. Бу иннинэ үлэһит ыстааһыттан көрөн 60 эбэтэр 80% төлөнөр эбит буоллаҕына, мантан ыла куруук 100% төлөнөр буолуоҕа.
Балаҕан ыйыгар биэнсийэлээхтэр эбии 10 тыһ. солк. ылыахтара. Саастарынан тахсыбыт биэнсийэлээхтэр эрэ буолбакка, атырдьах ыйын 31 күнүгэр дылы инбэлиитинэн эбэтэр тулаайаҕынан биэнсийэни ылааччыларга эмиэ бэриллиэҕэ. Балаҕан ыйын 3 күнүгэр дылы харчы бэриллиэҕэ. Оттон балаҕан ыйын 3 күнүттэн биэнсийэни почтаттан ылааччыларга биэнсийэлэрин кытары түҥэтиллиэҕэ.
Балаҕан ыйыттан 14 саастарыттан 22-лэригэр дылы Арассыый олохтоохторо түмэллэргэ, быыстапкаларга уонна да атын култуурунай тэрээһиннэргэ сылдьалларыгар виртуальнай эбэтэр пластик каартаны оҥорторуохтара. Бу "Пушкинскай картаҕа" быйыл 3000 солк. харчылаах буолуоҕа.
Гараж турар сирэ бас билиигэ босхо оҥоһуллуон сөп. Маннык кыаҕы гарааһы бас билээччилэргэ уонна утумнааччыларга биэрдилэр. Гараж капитальнай буолуохтаах уонна 2004 сыл ахсынньы 12 күнүгэр дылы көҥүлэ суох тутуллубут буолуохтаах. Бас билиини оҥотторорго олохтоох дьаһалтаҕа тиийэҕит.
Бүгүҥҥүттэн эми-тому интэриниэтинэн аптекалар эрэ буолбакка, маркетплейстэр эмиэ атыылыыр бырааптаналлар. Ырысыаба суох эми дьиэҕэ дылы аҕалтарыаххытын сөп.
Инбэлииттэр реабилитацияларыгар атыыласпыт малларын кэмпэнсээссийэлэтэллэрин таһынан, бүгүҥҥүттэн электроннай сэртипикээти оҥотторуохтарын сөп — бэйэ талыытынан. Ону маҕаһыыннарга атыылаһаргытыгар туһаныахтарын сөп (тус харчыларын туһамматтарын курдук). Ити сэртипикээти социальнай харалтаҕа тиийэн оҥоттороллор.
Бүгүҥҥүттэн алын кылаас үөрэнээччилэрэ бары итии аһынан босхо хааччыллыахтара. Маннык миэрэ былырыыҥҥыттан киирбитэ, мантан инньэ дойдуга бүтүннүү киирдэ.
Балаҕан ыйын 1 күнүттэн ахсынньы 1 күнүгэр дыллы хоруона хамсыгыттан Арассыыйа оҥорбут быһыытын ылбыттар ортолоругар сүүйүүлээх оонньотуу ыытыллыаҕа. Уопсайа 100 тыһ. солк. 1 тыһ. бириис оонньонор. Вакцианы ылбыт дьн биир кэлим реестриттэн генерация ньыамытынан алҕас талан ылыахтара. Кыайыылаахха Госуслуги нөҥүө иһитиннэрии кэлиэҕэ. Сүүйбүт харчыгытын "Мир" картаҕа түһэрэллэр.
