Киир

Киир

Саха сирин ытыктабыллаах олохтоохторо!

Бүгүн биһиги биир саамай үөрүүлээх, умнуллубат кэрэ түгэннэртэн биирдэстэрин – балаҕан ыйын 1 күнүн бэлиэтиибит. Өрөспүүбүлүкэ үрдүнэн 148 тыһыынча үөрэнээччи уонна 50 тыһыынча устудьуон саҥа үөрэх сылын көрсүөҕэ.

Билии киэҥ аартыгар үктэммит, оскуола аанын аан бастаан арыйар 16 тыһыынча кырачаан дьоҥҥо, итиэннэ түмүктүүр эмсээмэннэри туттарыахтаах оскуоланы бүтэрэр үөрэнээччилэргэ бүгүҥҥү күн ураты суолталаах.

Быйылгы үөрэх сылын үгэс буолбут күнүскү үөрэх көрүҥүнэн саҕалыахпыт. Бу бары үөрэнээччилэргэ, педагогтарга уонна төрөппүттэргэ улахан үөрүү буолар.

Дьаҥ өрө турбут кэмэ өрөспүүбүлүкэҕэ үөрэх инфраструктуратын сайыннарыыны тохтоппото. Куораттарбытыгар уонна улуустарбытыгар оскуолалары уонна оҕо уһуйааннарын тутуу тэтимин ыһыктыбатыбыт. Бу барыта Сахабыт сирин хас биирдии оҕотугар, хас биирдии ыччатыгар ханна олороруттан тутулуга суох үөрэҕин саҕалыырыгар биир тэҥ усулуобуйаны, кыаҕы хааччыйарга туһуланар.

Ол туһугар судаарыстыбаннай уонна муниципальнай былаас кэлим, көдьүүстээх үлэни тэрийэбит, үөрэҕи салайыы тиһигин тутулун уларыта тутууну саҕалыахпыт. Бары күүспүтүн түмнэхпитинэ, 2024 сылга үөрэх хаачыстыбатынан Арассыыйа 15 бастыҥ эрэгийиэнин ахсааныгар киириэхпит диэн бигэ эрэллээхпин. Ол түмүгэр Саха сирин хас биирдии кырачаан олохтооҕо дьоһун үөрэхтэнэр, өрөспүүбүлүкэтин уонна дойдутун туһугар бэйэтин кыаҕын арыйан олоххо толору туһанар, бары эйгэҕэ күрэстэһэр кыахтаныаҕа.

Күндү доҕоттор! Бу сырдык үтүө күн барыгытыгар чэгиэн туругу, үтүө санааны, эйэни уонна этэҥҥэ буолууну баҕарабын!

Оҕолорбут ситиһиилэринэн үөрдэ турдуннар, хас биирдии дьиэҕэ үөрүү уонна дьол тосхойдун!

Саха Өрөспүүбүлүкэтин Ил Дархана Айсен Николаев.

Тарҕат:

Санааҕын суруй