Киир

Киир

Өлөөн улууһун Харыйалааҕар сабыс-саҥа аныгылыы таас, 125-75 миэстэлээх оскуола-сад үлэҕэ киирдэ. Бу туһунан Ил Дархан уонна бырабыыталыстыба дьаһалтатын пресс-сулууспата суруйар.

Таас тутуу 3,5 тыһ. кв.м. иэннээх, АЛРОСА уонна өрөспүүбүлүкэтээҕи Инвестбырагыраама үптэринэн — 600 мөл.солк. тутулунна.

"Манна улууска эрэ буолбакка, бүтүн Арктика киэҥ-нэлэмэн сиригэр-уотугар саамай үчүгэй оскуола-сад арылынна. Мин оҕолор тустарыгар олус үөрэбин, кинилэр ханна олороллоруттан тутулуга суох, хаачыстыбалаах тэҥ үөрэҕи уонна сайдыыны ылыахтаахтар", - диэн Айсен Николаев үөрүүлээх арыллыы кэмигэр эппит. Кини үөрэнээччилэргэ, учууталларга, төрөппүтэргэ истиҥ эҕэрдэтин, баҕа санаатын тиэрдэн туран, оскуола кэлэктиибигэр саҥа оптуобуһу ылалларыгар сэртипикээти бэлэх уунна.

АЛРОСА генеральнай дириэктэрэ Сергей Иванов хампаанньа улууһу кытары бииргэ үлэлэһэн, улуус социальнай-экэнэмиичэскэй сайдыытыгар эппиэтинэһи сүгэрин бэлиэтээн эттэ. "Биһиги кэлэр да өттүгэр улууска инфраструктура сайдыытыгар инвестицияны угуохпут уонна улуус экологиятын харыстыырга үлэлэһиэхпит. Оҕолор — биһиги инники кэскилбит, кинилэргэ анаан саҥа эбийиэктэр үлэҕэ киирэллэрэ үөрүүлээх", - диэн Сергей Иванов тоһоҕолообут.

Саҥа оскуолаҕа үүнэргэ-сайдарга бары усулуобуйа тэриллибит: киэҥ-куоҥ кэбиниэттэр, саахыматтыыр зона, бибилэтиэкэ, физкултуура уонна аактабай саалалар бааллар. Оскуола тиэргэнигэр оҕо уонна успуорт былаһааккалара тупсаҕай гына оҥоһуллубуттар. 

 

Тарҕат:

Санааҕын суруй

Бүтэһик сонуннар