Бүгүн, балаҕан ыйын 15 күнүгэр, Хаҥалас улууһун Өктөмүгэр П.И.Шадрин аатынан орто оскуола саҥа тупсаҕай дьиэтэ үлэҕэ киирдэ. Бу иннинэ 1976 сыллаах хаарбах туруктаах мас оскула үөрэнээччилэрэ 4 араас сиринэн көһө сылдьан үөрэнэргэ күһэллибиттэрэ.
Өктөм оскуолатын саҥа дьиэтин тутуу туһунан быһаарыыны 2018 сыллаахха Айсен Николаев ылыммыта, 2019 сыл муус устарыттан оскуола тутуута саҕаланан барбыта. Бүгүн бу үөрүүлээх тэрээһиҥҥэ Айсен Николаев кэлэн үөрэнээччилэри, төрөппүттэри, учууталлары уонна нэһилиэк олохтоохторун эҕэрдэлээтэ уонна оскуола дириэктэригэр оптуобус атыылаһалларыгар сэртипикээти туттарда.
Саҥа тутуу өрөспүүбүлүкэтээҕи Инвесбырагырааманан тутуллан үлэҕэ киирдэ. 5300 кв. м. саҥа икки этээстээх тутууга 220 үөрэнэр миэстэ уонна 100 уһуйаан миэстэтэ көрүллүбүт. Уһуйааҥҥа 131 кв м. бэриллибит, туспа киирэр ааннаах, онно 4 бөлөххө 25-тии кырачаан сылдьыаҕа. Быйыл саҥа оскуолаҕа 248 оҕо үөрэнэр, туох баар бары аныгылыы ирдэбилгэ эппиэттэһэр кылаастар, саалалар, аһыыр сир, бибилэтиэкэ кинилэри билии киэҥ байҕалынан сирдиэхтэрэ.
