Чурапчы улуууһун үөрэҕин управлениетын начаалынньыга Юрий Посельскай иһитиннэрбитинэн, быйылгы үөрэх дьылын бары үөрэх тэрилтэлэрэ хамсыктан харыстанар миэрэлэри тутуһан күнүскү үөрэхтэн саҕалаабыттар. Билигин оҕолор уонна үлэһиттэр ортолоругар ыарыы улаатан, улуус 25 оскуолатыттан 8 оскуолата дистанционнай ньыманы туһанан үөрэтиэхтэрэ, оттон 3 оскуола (Мугудай, Хадаар уонна Үрэх Күөрэ) толору дистанционнай үөрэххэ көспүттэр. Оттон 19 уһуйаан бары уруккутун курдук үлэлии олороллор. Бу туһунан улуус дьаһалтатын пресс-сулууспата иһитиннэрэр.
Юрий Посельскай хамсык тарҕанан иһэринэн сибээстээн, төрөппүттэр оҕолорун дьон тоҕуоруһар сирдэригэр мээнэ сылдьыбаттарын кытаанах хонтуруолга ылалларыгар эппит. Маны таһынан улууска балаҕан ыйын 23-24 күннэригэр үөрэх үлэһиттэрин балаҕан ыйынааҕы мунньахтара буолуохтаах, онно иитии чааһыгар сүрүн болҕомто ууруллуохтаах, балаҕан ыйын 24 күнүгэр төрөппүттэргэ уопсай онлайн мунньах ытыллыаҕа.
Улуустааҕы киин балыыһа кылаабынай бырааһа Артем Ксенофонтов быһыыны нэһилиэнньэ 62%-на ылбытын эттэ, оттон уопсай кэлэктиибинэй иммунитет үөскүүрүгэр өссө да 20 бырыһыан киһи быһыыны ылыахтаах. Сылаҥ, Мындаҕаайы уонна Чурапчы сэлиэнньэтэ быһыыны ылыыга көхтөөхтөрүн бэлиэтээбит.
Маны таһынан окко наадыйар чурапчыларга тиэйиини саҕалыахтара. Билигин 21,9 туонна от бэлэмнэниллибит, мобильнай биригээдэлэр 5,8 туоннаны бэлэмнээбиттэр. Бу туһунан улуус баһылыгын бастакы солбуйааччыта Алексей Ноговицын кэпсээбит.
