Куорат устатын-туоратын тухары, сэлэлии үүммүт намчы хатыҥнар, "көмүс" сэбирдэхтэринэн сэмээр тамнааттана тураллар.
Эмиэ биир сайын ааста.
Биһиги эҥэр, хойукка диэри сылаас күннэр турдулар. Буолаары буолан сэдэх самыырдаах, үүт-тураан күннэр.
Дьэ бүгүн эрэ барбах самыырдаата. Даачалаахтар оҕуруоттарын аһын номнуо хомуйбуттара.
Куораппыт уһун уонна тыйыс кыһыҥҥа бэлэмнэнэр. Уу, сылаас биэрэр утумнар ылааҥы күннэри баттаһа өрөмүөннэннилэр.
Хас да микрооройуоҥҥа таас дьиэлэр эркиннэрэ кырааскаланна, хаппытаалынай өрөмүөн ыытылынна. Үс уулуссаҕа аспаал уурулунна. Куорат арҕаа өттүгэр, түөрт даача лиинньийэтигэр уот остуолбата уларытылынна, саҥа ситим тардылынна.
Олохтоох былаастар биллэрбиттэринэн, куорат бары түөлбэлэригэр, сылаас болдьохтоох кэмигэр бэрилиннэ. Сотору тымныйыа.
Мииринэй быйылгы кыстыга этэҥҥэ, нус-хас эрэ буоллун диэн баҕарыаххайыҥ.
Станислав Алексеев. Мииринэй куората.