Саха сиригэр “Моя республика” диэн өрөспүүбүлүкэ олохтооҕун каартатын оҥоруу саҕаланна. Бу – чэпчэтиинэн туһанааччыларга эрэ буолбакка, көннөрү да гражданнарга аналлаах босхо дебетовай каарта. Универсальнай каартаны өрөспүүбүлүкэтээҕи “Алмазэргиэнбаан” “Мир-JCB” төлөбүр систиэмэтин базатыгар таһаарда.
Алтынньы 1 күнүттэн “Моя Якутия” каартаны өрөспүүбүлүкэ бары олохтоохторо олорор сирдэриттэн, чэпчэтиигэ туһанар категорияларыттан тутулуга суох ылар кыахтаннылар. “Үлэ бастакы түһүмэҕэр каарта хайдах үлэлиирэ, тэхиниичэскэй өрүтэ бэрэбиэркэлэннэ. Каарта өрөспүүбүлүкэ хас биирдии олохтооҕо социальнай өҥөлөрү ылыытын хаамыытын чэпчэтэр аналлаах. Дьон каартаны илиитигэр туттаҕына, биһиги өҥө көрүҥүн өссө элбэтиигэ үлэлэһиэхпит”, – диэн бырабыыталыстыба бэрэссэдээтэлэ Андрей Тарасенко иһитиннэрдэ. Кини бэлиэтииринэн, биир кэлим каарта дьон олоҕун чэпчэтэр, өҥөлөрүнэн туһанарга табыгастаах усулуобуйаны тэрийэр.
Каарта кимиэхэ ананарый уонна туохха туһалыырый?
“Моя Якутия” диэн каартаны Саха сирин 14-тэн үөһээ саастаах, өрөспүүбүлүкэ иһигэр быстах кэмҥэ эбэтэр олохтоохтук олорор бэрэпиискэлээх хас биирдии граждана тутар кыахтаах. Каарта нөҥүө чэпчэтиинэн туһанар нэһилиэнньэҕэ аналлаах көмө уонна бонус систиэмэтэ үлэлиир. Онуоха социальнай өйөбүл миэрэлэрэ каартаны бас билээччигэ докумуона да суох бэриллэллэр. Онон сырыы аайы ыспыраапка хомуйсар, дастабырыанньа таһар наадата суох. “Моя Якутия” каартаҕа социальнай төлөбүр эмиэ киирэр.
Оттон чэпчэтиинэн туһаммат дьоҥҥо каарта тугу мэктиэлиирий? Бастатан туран, чэпчэтиинэн туһанааччыларга курдук, кинилэргэ эмиэ бырыһыан ааҕыллыытын уонна счёт тобоҕун опцията кыаллар. Иккиһинэн, каартаҕа хас биирдии атыылаһыыттан кешбэк (харчы сорох чааһын төннөрүү) мунньуллар. Ону тэҥэ “СВОИ” диэн эрэллээх ситим систиэмэтин маҕаһыыннарыттан атыылаһыы иһин анал үрдэтиллибит кешбэк түһэр. Ол эбэтэр “Моя Якутия” каарта бас билээччитигэр барыһы киллэрэрин таһынан олус табыгастаах үп үстүрүмүөнэ буолуон сөп.
Айан кытта төлөнөр
“Моя Якутия” каартанан уопсастыбаннай тырааныспар өҥөтүн төлүүр табыгастаах. Биир кэлим социальнай айан өҥөтүнэн туһанааччыларга чэпчэтиилээх тарыып 494 солк. оннунан хаалар. Дьокуускай куорат элбэх оҕолоох ыалларыгар “Моя Якутия” каартанан куорат устун 23 солк. кээмэйдээх чэпчэтиилээх тарыып олохтонор. Онтон атыттар муниципалитет олохтообут тарыыбынан айанныыллар.
МИР төлөбүрдээх систиэмэтин туһата
“Моя Якутия” төһө даҕаны социальнай хайысхалаах буоллар, өрөспүүбүлүкэ олохтооҕо барыта туттар кыахтаах. Бу – сыл устата босхо хааччыллыылаах үгэс буолбут банковай, дебетовай каарта буоларын таба өйдүөххэ наада.
Итини таһынан, каарта МИР национальнай төлөбүрдээх ситим бары кыаҕынан туһаныахха сөп. Олор истэригэр “ПриветМир” диэн эрэллээх бырагыраама аахсыйаларыгар кыттаҕын, Wildberries ситим маҕаһыыннарыгар чэпчэтиинэн, Арассыыйа иһигэр туристическай сынньалаҥҥа кешбэгинэн туһанаҕын, төлөпүөн нүөмэринэн ыйга 200 тыһ. солк. диэри хамыыһыйата суох харчы ыытар, мобильнай сибээһи, интэриниэти, тэлэбиисэри, хомунаалынай өҥөнү, ГИБДД ыстараабын, үөрэҕи каарта нөҥүө бырыһыана суох төлүүр кыахтанаҕын. Сотору кэминэн каартанан судаарыстыба өҥөлөрүн чэпчэтиилээх төлүүр кыаллыаҕа.
Каартаны хантан ылабытый?
“Өрөспүүбүлүкэ олохтоохторун “Моя Якутия” биир кэлим каартаны ыларга ыҥырабыт. АЭБ улуустарга баар баары филиалларыгар каартаны босхо оҥоробут. Эрэгийиэн олохтооҕун каартатын көмөтүнэн киһи барыстаныан эмиэ сөп. Этиллибитин курдук, ханнык араҥаҕа сылдьарыттан тутулуга суох кимиэхэ баҕарар элбэх кыах бэриллэр. Кини куорат эйгэтигэр, тырааныспарга, социальнай өҥөлөргө, чэпчэтиилэргэ, бонустарга аартыгы арыйар”, – диэн “Алмазэргиэнбаан” АУо АКБ Бырабылыанньатын бэрэссэдээтэлэ Николай Долгунов бэлиэтиир.
Каартаны оҥоруу уонна сыл устата туһаныы босхо. “Моя Якутия” каартаны Алмазэргиэнбаан https://albank.ru/ru/cards/card-order/ecs-card/ саайтын биитэр «АЭБ Онлайн» мобильнай приложение нөҥүө оҥорторуохха сөп. Ону тэҥэ бааҥҥа бэйэтигэр эмиэ тиийиэххитин сөп. Сиһилии https://card.sakha.gov.ru/ билсиҥ.
«Алмазэргиэнбанк» АУо АКБ уопсастыбаннаһы кытта үлэҕэ сулууспата.
