Киир

Киир

 

Былаастар этэллэринэн – бу быстах кэмҥэ дьаһал. Оттон үөрэх тэрилтэтин ректора этэринэн – уораҕайы Доруобуйа Харыстабылын министиэрстибэлэригэр биэрии – бу быһаччы үөрэх тэрилтэтин сабыы кэриэтэ.

Алтынньы 9 күнүгэр Аччыгый билим академиятын ректора Василий Павлов уурайарын туһунан биллэрдэ. Биричиинэтэ – Хаҥалас улууһун, Чапаево нэһилиэгэр үлэлии турар бу үөрэх тэрилтэтин, хамсыгынан ыалдьыбыт дьону эмтиир обсеравтор туһатыгар биэриини кытта сөпсөспөт буолуу.

Маныаха, Саха сирин үөрэҕириитин уонна билимин миниистирэ Михаил Сивцев бэлитэтииринэн: “Хаҥалас улууһугар мантан атын ордук сиргэ ыарыһахтары киллэрэр сир-уот суох. Бу соҕотох табыгастаах барыйаан. Бүттүүн өрөспүүбүлүкэ үрдүнэн хамсык өрө турбут кэмигэр, маннык дьаһаллары утары барыы – хайдах да сатаммат”.

Хаҥалас улууһун кылаабынай бырааһа Ньургун Степанов: «Балаһыанньа биһиги улууска кытаанах. Күннэтэ хамсык ыарыыны чинчийиигэ 35-37 анаалыс ылабыт. Оҕолор, аҕам саастаах дьон ыалдьаллара үксээтэ. Улуус балыыһатын инфекционнай салаата бүгүҥҥү күннээххэ ыарыһахтарынан ыы-быччары туолла. Таһынан баран эрэр. Ол иһин биһиги кыһалҕаттан, маннык ыксаллаах миэрэҕэ тиийдибит. Элбэх барыйааннары сыымайдаан көрбүппүт. Ол эрээри, Роспотребнадзор туох баар бары ирдэбиллэригэр эппиэттэһэр соҕотох тутуутунан – Аччыгый билим академиятын уопсайа эрэ буолан таҕыста. Тоһоҕолоон этэбин – бу быстах кэмҥэ миэрэ. Ыйааһын хараҕар дьон олоҕо уонна доруобуйата ууруллан турдаҕына, бирикээстэр ырытыллыбаттар. Сэрии кэриэтэ кэмҥэ олоробут!»

Аччыгый билим академиятын ректора Василий Павлов: «Туох баар быстах миэрэлэр тустарынан сурахтар – суос сымыйа! Былырыын, оҕолор олорор уопсайдарыгар, эмиэ быстах кэмҥэ обсерватор буолан турбуппут. Ыалдьыбыт дьону кытта ситимнээх, алтыспыт эрэ дьон сыталлара. Ол өссө соччо куттала суох. Билигин, чахчы ыалдьыбыт, ыарахан туруктаах ыарыһахтары өр кэмҥэ эмтиир инфекционнай балыыһаҕа кубулутан эрэллэр. Үөрэх кыһата МИЗО (министерство имущественных и земельных отношений) нөҥүө Доруобуйа Харыстабылын министиэристибэтигэр баран эрэр. Ол хайдах да быстах кэмҥэ буолбатах.»

 

Уопсайга бастакы ыарыһахтар киирдилэр

Ректор этэринэн, бэҕэһээ номнуо, өрөспүүбүлүкэ үөрэҕириитин уонна билимин миниистирин солбуйааччы Владимир Тихонов уонна Хаҥалас улууһун баһылыгын солбуйааччы Владислав Голоков итиэннэ МИЗО бэрэстэбиитэллэрин дэлэгээссийэлэрэ кэлэн барбыттар.

Павлов бэлиэтииринэн: «Кинилэр уопсай күлүүстэрин ыллылар. Уопсайтан туох баар туттар тэрили таһаардылар. Бүгүн 17 ыарыһаҕы Өктөм балыыһатыттан көһөрөн аҕаллылар. Биһиги оҕолору кэтэһэн олорбуппут, сотору олохтоору уопсайдарыгар. Дьыалатыгар маннык буолан таҕыста..Мин хайыы-үйэ үлэбиттэн уурайбыт киһи тус санаабын биллэрдим..»

Тарҕат:

Санааҕын суруй

Бүтэһик сонуннар