Мииринэйгэ Кыайыы бырааhынньыга

Бүгүн алмаастаах кыраай киин куоратын Кыайыы болуоссатыгар тымныы тыаллаах күнү аахсыбакка бэрт үгүс киhи муhунна.

Ыам ыйын 8 күнүттэн ыла, солбуhа-солбуhа, «Вахта памяти» - «хаки» камуфляж кууркалаах, георгиевскай лиэнтэлээх уолаттар уонна кыргыттар Сталин пааматынньыгын аттыгар, бойобуой пуоска турдулар. Пуоска Чернышевскайтан кэлбит кадеттар куорпустарын уонна МРТК устудьуоннарын «Барс» байыаннай кулуубун эдэр байыастара турдулар.

Ыам ыйын 9 күнүн бэлиэтиир миитин байыаннайдыы болдьохтоох чааhыгар буолла.

Манна, Мииринэй оройуонун, куорат уонна «АЛРОСА» хампаанньа салайааччылара, тыыл бэтэрээннэрэ, уопсастыбаннас бэрэстэбиитэллэрэ тыл эттилэр.

Ол кэннэ И.В. Сталин пааматынньыгын аттыгар бочуоттаах миэстэлэргэ олорбут сэрии уонна тыыл бэтэрээннэригэр, ыччаттар махтанан, сүгүрүйэн туран сибэкки дьөрбөтүн туттартаатылар.

Миитин биир долгутуулаах түгэнинэн православнай сиэр-туом – «Кириэстээх хаамыы» («Крестный ход») толорулунна.

Бу туому сэргэ, Сибэтиэй Троица хараамыттан дуорааннаах куолакаллары тыаhатан, алдьархайдаах сэрии сиэртибэлэрин туhунан санаттылар.

Кыайыы күнүгэр аналлаах бырааhынньык биир чыпчаал түгэнинэн «Бессмертный полк» аахсыйа буолла. Комсомольскай, Ойуунускай уулуссаларынан уонна Ленинград бэрэспиэгинэн Кыайыы болуоссатыгар биир ньыгыл холуоннанан таҕыстылар.

Быйыл кыттааччы баhаам.

Миитини ыам ыйын 9 күнүгэр аналлаах бырааhынньыктааҕы Кыайыы салюта киэргэттэ.

Ол кэннэ дьон Ленинград бэрэспиэгин устун Ленин болуоссатын диэки дьулуста. Бырааhынньыктааҕы тэрээhини дойдуга бэриниилээх буолуу патриоттуу кэнсиэрэ киэргэттэ.

Болуоссаттарга, хараам искибиэригэр, күммүт-дьылбыт хахсаатын аахсыбакка, норуот күүлэйэ хойукка диэри бара турда.

Бу Улуу Кыайыыны уруйдуур бырааһынньыктааҕы тэрээһин хаһааҥҥытааҕар даҕаны бэрт сэргэхтик ыытылынна.

Станислав Алексеев. Мииринэй куорат. Ааптар хаартыскалара.