Киир

Киир

Алтынньы 15 күнүттэн сэтинньи 14 күнүгэр диэри дойду үрдүнэн нэһилиэнньэ биэрэпиһэ ыытыллар. Уустук суоллаах-иистээх, кырыы сирдэргэ номнуо саҕаламмыта.

Биэрэпискэ кыттар үс ньыма баар. Холобур, алтынньы 15 күнүттэн сэтинньи 8 күнүгэр диэри дьиэттэн тахсыбакка “Госуслуги” порталынан кыттыахха сөп. Дьиэ кэргэнтэн (хаһаайыстыбаттан) биир киһи порталга киирэн бэйэтин уонна кэргэттэрин туһунан информацияны толоруон сөп.

“Участие в переписи населения” өҥөнү туһанар дьон анкыатаҕа билигин олорор сирдэрин (регистрациялаах сирдэрин кытта сөп түбэспэт буолуон сөп), дьиэ кэргэннэрин ахсаанын ыйыахтаахтар.

Электроннай биэрэпистиир илиискэ ыйытыыны сиһилии быһаарар, холобурдаах сүбэлэр бааллар. Өйдөөбөтөххө, портал тэхиниичэскэй киинигэр ыйытыы ыытыахха сөп. Хоруйа 24 чаас иһигэр тус кэбиниэккэ кэлэр.

Ирдэнэр анкыатаны (илииһи) толорон, ыйытыыга хоруйдаан баран, кыттааччы анал кунуопканы баттаан, докумуону Росстатка ыытар. Росстат бэрэбиэркэлээн баран, биэрэпис кыттыылааҕар кыттыбыты туоһулуур QR-куоду ыытар. Ол куоду дьиэни кэрийэн биэрэпиһи ыытар дьоҥҥо көрдөрүллүөхтээх.

Иккис ньыма – биэрэпис учаастагар тиийии. Холобур, киин куоракка сэтинньи 14 күнүгэр диэри 100-тэн тахса учаастак үлэлиэхтээх. Хас биирдии учаастакка хонтуруоллуур анал үлэһит баар буолар. Кини докумуону хайдах сөпкө толорору ыйар-кэрэр.

Үһүс ньыма – “былыргылыы”. Биэрэпис ыытыллар күннэригэр анал үөрэҕи ааспыт исписэлиистэр дьиэлэри кэрийэ сылдьан эмиэ суруйуохтара. Онон порталга киирэн толорору сатаабат, анал учаастакка баралларын ыарырҕатар дьон, исписэлиис кэлэрин дьиэлэригэр олорон кэтэһиэхтэрин сөп.

 

Тарҕат:

Санааҕын суруй

Бүтэһик сонуннар