Алтынньы 13 күнүгэр Мииринэйтэн Дьокуускайга "Полярные авиалинии" авиахампаанньа Л-410 санитарнай сөмөлүөтүнэн икки хат дьахтар көтөн испит, биирдэрэ талыыта киирэн, төрөөн саҕалаабыт.
Хат дьахталлары арыаллаан испит акушер-гинеколог Евгений Целых, неонатолог-быраас Денис Баишев уонна медсиэстэрэ Ньургуйаана Чучайцева кырачаан этэҥҥэ төрүүрүгэр көмөлөспүттэр. Хаан баттааһына хамсаабатын туһуттан, экипаж бастайаннай үрдүгүнэн көппүт уонна Дьокуускайга кэлэн чаас аҥара эргийбит. Бу туһунан авиахампаанньа пресс-сулууспата суруйар.
Сөмөлүөт командира Валерий Матвейчук, иккис пилот Дархан Старков уонна авиатехник Андрей Алексеев 21 ч. 20 мүн. Дьокуускай аэропордугар этэҥҥэ түспүттэр.
— Мииринэйтэн көппүппүт кэннэ 40-ча мүнүүтэ буолан баран, дьахтар төрөөн эрэр диэн биллэрбиттэрэ, — диэн командир Валерий Матвейчук кэпсиир. — Хаан баттааһына халбаҥнаабатын туһуттан биһиги наар биир үрдүгүнэн көттүбүт, сөмөлүөккэ уоту холбоотубут уонна температураны эбэн биэрбиппит. Дьокуускайга үрдүкпүтүн намтатарга сигнал биэриэхтэригэр дылы чаас аҥара эргийэ сырыттыбыт.
Дьоллоох ийэни уонна кырачаан кыыһы тута перинатальнай кииҥҥэ илдьибиттэр. Быраастар ийэ уонна кырачаан доруобуйалара этэҥҥэ дииллэр, кырачаан билигин кислородунан тыынар, доруобуйата тупсан иһэр.
