Саха сиригэр хоруона хамсыгар ордук быһыыны ылбатах саастаах дьон хаптарар буолбут. Кинилэр сыстыганнаах ыарыыны ордук ыараханнык аһарыналлар, эмтэтиитэ да уустугурар диэн Ольга Балабкина брифинг кэмигэр кэпсээтэ.
Кини Нам уонна Мэҥэ Хаҥалас улуустарыгар тахсыбыт балаһыанньа ордук болҕомтону эрэйэрин эттэ.
— Кэнники 3 нэдиэлэҕэ Мэҥэ Хаҥаласка ыарыһах ахсаана олох түспэккэ турар, ол иһин улуустааҕы суһал ыстаапка хааччахтыыр миэрэлэри кытаатыннаралларыгар өссө төгүл этэбин, кинилэр быһыыны биэриини тэтимирдэллэрэ уолдьаста. Билигин Бүлүүгэ, Ньурбаҕа, Тааттаҕа уонна Чурапчыга балаһыанньа ордук уустугуран турар. 8 ыраах сытар нэһилиэккэ кытары ыарыы тиийдэ, оттон онно сөптөөх көмөнү оҥорор дэбигэс буолбатах. Ордук ыарахан түгэн Өлүөхүмэ улууһугар таҕыста, онно 7 киһи ыарыйда. Улуустааҕы ыстаап миэстэтигэр эминэн-томунан хааччылыыга болҕомтотун хатыан наада. Үөһээ Бүлүүгэ, Хаҥаласка, Уус Алдаҥҥа балаһыанньа тупсан барбата. Уус Алдаҥҥа олохтоох балыыһа көмөнү оҥорорго толору бэлэмнээҕин үрдүнэн, олохтоохтор Дьокуускайга кэлэн анньыһаллар. Онон уус алданнар Бороҕоҥҥо эмтэниэххитин наада, онно бары усулуобуйа тэриллибитэ, - диэтэ Ольга Балабкина.
